PensionsEurope: Çoxsütunlu pensiya modelləri daha dayanıqlı nəticələr verir

Çoxsütunlu pensiya sistemləri pensiya təminatının müxtəlif məqsədlərinə nail olunması və risklərin balanslaşdırılması baxımından ən səmərəli modellərdən hesab edilir. Bu fikirləri “PensionsEurope” təşkilatının Baş katibi və Baş icraçı direktoru (CEO) Matti Leppala Bakıda keçirilən XI Azərbaycan Beynəlxalq Sığorta Forumunda səsləndirib.

Onun sözlərinə görə, hər hansı bir pensiya mexanizmi bütün sosial və iqtisadi məqsədləri eyni anda qarşılamaq imkanına malik deyil. Buna görə də pensiya sistemində müxtəlif alətlərin və yanaşmaların bir arada tətbiqi vacibdir.

Matti Leppala bildirib ki, dövlət pensiya sistemləri əsasən vətəndaşların minimum sosial təminatını qorumağa, yoxsulluq riskini azaltmağa və cəmiyyətdə həmrəyliyi gücləndirməyə xidmət edir. Lakin bu model təkbaşına bütün pensiya məqsədlərini reallaşdıra bilmir.

Onun sözlərinə görə, peşə pensiya proqramları gəlirlərin əvəzlənməsində və uzunmüddətli maliyyə resurslarının formalaşdırılmasında mühüm rol oynayır. Fərdi pensiya mexanizmləri isə insanlara öz maliyyə planlamalarını daha çevik şəkildə qurmağa imkan yaradır.

Leppala qeyd edib ki, Avropada bir çox vətəndaş peşə pensiya sistemlərindən kənarda qaldığı üçün fərdi yığım alətlərinə ehtiyac getdikcə artır.

O vurğulayıb ki, ən uğurlu pensiya sistemləri müxtəlif sütunları birləşdirərək risklərin bir mənbədə cəmləşməsinin qarşısını alır. Bu yanaşma investisiya portfellərində risklərin diversifikasiyası prinsipinə bənzəyir.

Aytac