Azərbaycanın sığorta bazarında ÜDM payı 1,63 %-ə çatıb

Azərbaycanda sığorta haqlarının ümumi daxili məhsuldakı (ÜDM) payı 2025-ci ildə 1,63 %-ə yüksəlib. Bu barədə Azərbaycan Sığortaçılar Assosiasiyasının İcraçı direktoru Abas Miskərli Bakıda keçirilən XI Azərbaycan Beynəlxalq Sığorta Forumunda (AIIF 2026) bildirib.

Onun sözlərinə görə, əldə olunan nəticələr sığorta bazarının bütün peşəkar iştirakçılarının, xüsusilə də sığorta şirkətlərinin fəal fəaliyyəti sayəsində mümkün olub.

Miskərli qeyd edib ki, son altı ildə həyata keçirilən ümummilli sığorta maarifləndirmə kampaniyaları da bazarın inkişafına mühüm töhfə verib.

“Bu layihənin ümumi büdcəsi təxminən 3-4 milyon ABŞ dolları təşkil edir. Bu il və qarşıdakı illər üçün isə böyük hədəflərimiz var”, –  o vurğulayıb.

İcraçı direktorun sözlərinə görə, əsas məqsəd Azərbaycanda sığortanın nüfuzetmə səviyyəsini hazırkı göstəricidən 3-4 dəfə artırmaq, sığorta haqlarının ÜDM-dəki payını yüksəltmək, sığorta xidmətlərinə çıxışı daha da sadələşdirmək və mövcud qorunma boşluqlarını minimuma endirməkdir.

O bildirib ki, bu istiqamətdə həyata keçirilən tədbirlər ölkədə sığorta mədəniyyətinin formalaşmasına və əhalinin maliyyə dayanıqlığının gücləndirilməsinə xidmət edir.

Aytac Zeynalova