Deputat: yerli məhsulların daxili bazarda rəqabət qabiliyyəti artacaq

"Ələt Azad İqtisadi Zonası haqqında" qanuna təklif edilən dəyişikliklər azad iqtisadi zonalarda istehsal olunan Azərbaycan mənşəli məhsulların daxili bazarda rəqabət qabiliyyətinin artırılmasına və investisiya mühitinin yaxşılaşdırılmasına xidmət edəcək. Bunu Milli Məclisin deputatı Rövşən Muradov bildirib.

Deputatın sözlərinə görə, dəyişikliklərin əsas məqsədi yüksək əlavə dəyər yaradan investisiya layihələrinin həyata keçirilməsini təşviq etmək, sənaye istehsalını inkişaf etdirmək, qeyri-neft sənayesinin rəqabət qabiliyyətini artırmaq və Azərbaycanın regiondakı digər azad iqtisadi zonalarla rəqabət üstünlüyünü qorumaqdır.

Muradov qeyd edib ki, hazırkı qaydalara əsasən, azad iqtisadi zonada istehsal olunan mallar ölkənin əsas iqtisadi ərazisinə gətirilərkən tətbiq edilən gömrük rüsumları həmin məhsulların daxili bazarda rəqabət imkanlarını zəiflədir. Eyni zamanda, Azərbaycanın azad ticarət sazişləri bağladığı bəzi ölkələrdən, xüsusilə Avropa dövlətlərindən idxal olunan analoji məhsullar bazara sıfır və ya güzəştli gömrük rüsumu ilə daxil olur.

Onun sözlərinə görə, nəticədə Azərbaycanda istehsal edilən məhsullar daxili bazarda bəzi idxal malları ilə müqayisədə daha yüksək gömrük yükü ilə üzləşir ki, bu da investisiya layihələrinin iqtisadi səmərəliliyinə mənfi təsir göstərir.

Deputat bildirib ki, qanun layihəsi bu uyğunsuzluğu aradan qaldıraraq azad iqtisadi zonalarda istehsal olunan yerli məhsulların daxili bazarda idxal məhsulları ilə bərabər rəqabət aparmasına şərait yaradacaq.

Muradovun sözlərinə görə, dəyişikliklər azad zonada istehsal olunmuş müəyyən malların əsas iqtisadi əraziyə gətirilməsi zamanı, mənşə qaydaları və digər qanunvericilik tələbləri yerinə yetirildiyi halda, gömrük rüsumundan azad edilməsini nəzərdə tutur. O vurğulayıb ki, mexanizm yalnız real istehsal fəaliyyəti həyata keçirən müəssisələrə şamil ediləcək və mümkün sui-istifadə hallarının qarşısını almaq üçün konkret şərtlərlə tətbiq olunacaq.

Deputat hesab edir ki, dəyişikliklərin qəbulu yerli və xarici investisiyaların artmasına, yüksək texnologiyalı istehsal layihələrinin reallaşmasına, qeyri-neft sektorunun inkişafının sürətlənməsinə və iqtisadiyyatın şaxələndirilməsinə töhfə verəcək.

Onun sözlərinə görə, ixracyönümlü müəssisələrin və istehsal güclərinin artması qeyri-neft ixracını genişləndirəcək, ölkəyə əlavə valyuta axını yaradacaq və yerli xammal istehsalçıları ilə xidmət təchizatçılarının istehsal zəncirinə inteqrasiyasını gücləndirəcək.

Muradov əlavə edib ki, yeni iş yerlərinin yaradılması və yüksək ixtisaslı kadrların hazırlanması məşğulluğun artmasına, beynəlxalq istehsal standartlarının tətbiqinin genişlənməsinə, həmçinin uzunmüddətli perspektivdə vergi bazasının genişlənməsi hesabına dövlət büdcəsi gəlirlərinin artmasına şərait yaradacaq.

Gülnar Nazimqızı