Slovakiya Azərbaycanla iqtisadi əməkdaşlığın genişləndirilməsində maraqlıdır - Baş nazirin müavini

Slovakiya Azərbaycanla enerji, infrastruktur, müdafiə sənayesi, informasiya texnologiyaları və Qarabağın bərpası sahələrində əməkdaşlığı genişləndirmək niyyətindədir. Bunu Slovakiyanın Baş nazirinin müavini və iqtisadiyyat naziri Denisa Sakova Bakıda keçirilən Azərbaycan-Slovakiya Biznes Forumunda bildirib.

Onun sözlərinə görə, 2024-cü ildə imzalanmış Strateji Tərəfdaşlıq haqqında Birgə Bəyannamə ikitərəfli münasibətlərdə yeni mərhələ açıb və artıq enerji, müdafiə sənayesi, investisiyalar, eləcə də azad edilmiş ərazilərin bərpasına dəstək layihələrində konkret nəticələr verir.

Sakova bildirib ki, forum yeni biznes əlaqələrinin qurulması, investisiyaların təşviqi və birgə layihələrin inkişafı üçün mühüm platformadır.

O qeyd edib ki, Slovakiya forumda enerji, infrastruktur, mühəndislik, müdafiə sənayesi, su təsərrüfatı, informasiya texnologiyaları, qida sənayesi və qabaqcıl sənaye həlləri sahələrini təmsil edən 25 şirkətlə iştirak edir.

Sakovanın sözlərinə görə, Azərbaycan Slovakiya üçün mühüm tərəfdaş, həmçinin Avropa ilə Cənubi Qafqaz və Mərkəzi Asiyanı birləşdirən strateji körpüdür. O bildirib ki, dəyişən geosiyasi şəraitdə etibarlı təchizat zəncirləri, nəqliyyat dəhlizləri və enerji təhlükəsizliyi xüsusi əhəmiyyət kəsb edir və Azərbaycan həm etibarlı enerji təchizatçısı, həm də regional logistika mərkəzi kimi rolunu artırır.

O vurğulayıb ki, enerji ikitərəfli əməkdaşlığın əsas istiqamətlərindən biri olaraq qalır və Azərbaycanın Avropanın enerji təhlükəsizliyinə verdiyi töhfə yüksək qiymətləndirilir.

Sakova əlavə edib ki, Slovakiya şirkətləri Azərbaycanın modernləşdirilməsi və Qarabağın bərpası layihələrində artıq iştirak edir. Onun sözlərinə görə, Baş Qərvənddə həyata keçirilən “Ağıllı kənd” layihəsi bu əməkdaşlığın uğurlu nümunələrindən biridir.
 

N.Təbrizli