Kulevi Neft Terminalı Rusiya neftindən imtina prosesini sürətləndirir

Gürcüstandakı Kulevi Neft Terminalının operatoru olan “Black Sea Petroleum” şirkəti xam neft təchizatının şaxələndirilməsi istiqamətində tədbirləri davam etdirdiyini və yaxın aylarda zavodun tamamilə Rusiya mənşəli olmayan xam neftin emalına keçəcəyini açıqlayıb.

Şirkətin məlumatına görə, Kulevi Neft Emalı Zavodu iyul ayında Qazaxıstan mənşəli xam neft qəbul edərək emal edib və bu prosesin avqust ayında da davam etdirilməsi planlaşdırılır.

Bildirilib ki, iyulun 1-də şirkət 2026-cı ilin avqust-sentyabr aylarından etibarən zavodun tam şəkildə Rusiya mənşəli olmayan xam neftin emalına keçəcəyini elan etmişdi.

Açıqlamaya əsasən, iyulun 3-də beynəlxalq ticarət şirkəti ilə imzalanmış saziş çərçivəsində avqustun 20-30-u tarixlərində Kulevi Neft Emalı Zavoduna Liviya mənşəli xam neft tədarük ediləcək. Müqavilə 2027-ci ilin sonunadək qüvvədə olacaq və onun uzadılması da nəzərdə tutulur.

Şirkət həmçinin qeyd edib ki, iyulun 24-də Avropa Komissiyası “Black Sea Petroleum”un qurumla fəal əməkdaşlıq etdiyini təsdiqləyib və altı aylıq keçid dövrünün məqsədinin Rusiya mənşəli xam neftin alternativ mənbələrlə əvəzlənməsi üçün şərait yaratmaq olduğunu bildirib.

“Black Sea Petroleum” diversifikasiya planının icrasını davam etdirdiyini, Avropa Komissiyası və digər aidiyyəti qurumlarla konstruktiv dialoq apardığını, həyata keçirilən tədbirlərlə bağlı yoxlanıla bilən məlumatlar təqdim etdiyini vurğulayıb.

Şirkətin açıqlamasında bildirilib ki, fəaliyyət bütün qanunvericilik və tənzimləyici tələblərə uyğun həyata keçirilir, daxili idarəetmə və nəzarət sistemləri gücləndirilir. Məqsəd Kulevi Neft Emalı Zavodunun Rusiya xaricindən xammal tədarükünə maneəsiz keçidini və müəssisənin fasiləsiz, dayanıqlı fəaliyyətini təmin etməkdir.