Azərbaycanın tranzit neft və qaz gəlirlərinin icrasında kəskin azalma qeydə alınıb

2025-ci il ərzində neft və qazın Azərbaycan ərazisi ilə ötürülməsindən əldə edilən gəlirlər (tranzit haqqı) üzrə daxilolmaların büdcə proqnozu ilə faktiki icrası arasında kəskin kənarlaşma müəyyən olunub.

"Report" xəbər verir ki, bu barədə Hesablama Palatasının Azərbaycan Dövlət Neft Fondunun (ARDNF) vəsaitlərinin formalaşdırılması və istifadəsinin auditinə dair hesabatında bildirilir. Sənədə əsasən, hesabat dövründə 25,4 milyon manat daxilolma proqnozlaşdırılsa da, faktiki daxilolma cəmi 0,01 milyon manat təşkil edib və proqnoz tapşırığı 0,04% icra olunub. Daxilolmaların kəskin azalmasına Rusiya-Ukrayna münaqişəsi səbəbindən Qara dəniz istiqamətində Qərb İxrac Boru Kəməri üzrə daşınmaların dayandırılması təsir göstərib.

Hazırda Azərbaycan nefti əsasən Bakı-Tbilisi-Ceyhan (BTC) boru kəməri, qazı isə Cənub Qafqaz Boru Kəməri (CQBK) vasitəsilə dəniz terminalı və beynəlxalq bazarlara nəql edilir.