Azərbaycanda 7 ayda istehlakçılara 122 milyon manat ƏDV qaytarılıb

Bu ilin yanvar-iyul aylarında Azərbaycanda fiziki şəxs olan istehlakçılara dövlət büdcəsindən 122 milyon 83,6 min manat Əlavə Dəyər Vergisi (ƏDV) geri qaytarılıb. Bu barədə İqtisadiyyat Nazirliyi yanında Dövlət Vergi Xidmətinin məlumatında bildirilir.

Geri qaytarılan ƏDV pərakəndə ticarət və iaşə obyektlərindən alınan mallara, həmçinin bir sıra xidmətlərə görə ödənilən vergini əhatə edib.

ƏDV-nin geri qaytarılması neft və qaz məhsulları, avtomobillər, alkoqollu içkilər və tütün məmulatları istisna olmaqla, pərakəndə ticarət və iaşə obyektlərindən alınan mallara şamil olunub.

Bundan başqa, teatr tamaşaları, film nümayişləri, muzey ziyarətləri və simfonik orkestr konsertləri, eləcə də tibb müəssisələri və özəl tibbi praktika ilə məşğul olan fiziki şəxslərin göstərdiyi tibbi xidmətlər üzrə ödənilən ƏDV də geri qaytarılıb.

İşğaldan azad edilmiş ərazilərdə yerləşən mehmanxanaların gecələmə və qalma xidmətlərinə görə ödənilən ƏDV də geri qaytarılma mexanizminə daxil edilib.

Hesabat dövründə xarici vətəndaşların Azərbaycanda fərdi istehlak məqsədilə aldıqları mallara görə “Tax Free” sistemi çərçivəsində dövlət büdcəsindən 5 milyon 248,1 min manat ƏDV qaytarılıb.

Aytac Zeynalova