Neft bahalaşıb

Dünya bazarlarında neft qiymətləri Hürmüz boğazı üzərindən daşınmalara dair qeyri-müəyyənliyin davam etməsi və ABŞ–İran qarşıdurmasının nizamlanmasında irəliləyişin olmaması səbəbindən çərşənbə günü ardıcıl dördüncü sessiyada da bahalaşıb.

"Brent" markalı etalon neftin fyuçersləri 26 sent artaraq bir barel üçün 91,28 ABŞ dollarına, ABŞ-nin yüngül WTI nefti isə 37 sent bahalaşaraq 85,31 dollara çatıb.

Bazar iştirakçıları əvvəllər qlobal neft və mayeləşdirilmiş təbii qaz (LNG) tədarükünün mühüm hissəsinin tranzit olunduğu Hürmüz boğazındakı prosesləri yaxından izləyir. Regionda gəmiçiliyin təhlükəsizliyi ilə bağlı Vaşinqton və Tehranın ziddiyyətli bəyanatları ixrac risklərini artırır. İnvestorlar həmçinin ABŞ-nin Enerji İnformasiyası Administrasiyasının (EIA) günün ikinci yarısında açıqlayacağı rəsmi neft ehtiyatları hesabatını gözləyirlər; ilkin bazar məlumatlarına görə, ötən həftə xam neft ehtiyatları azalsa da, benzin ehtiyatlarında artım qeydə alınıb.

N.Təbrizli