Azərbaycan balıq istehsalını və sertifikatlı toxumların payını artırmağı hədəfləyir – nazir müavini

Azərbaycan balıqçılıq sahəsində sahibkarların qeydiyyatının sadələşdirilməsini və balıq istehsalının artırılmasını əsas hədəflərdən biri kimi müəyyən edib. Bunu kənd təsərrüfatı nazirinin müavini İlhamə Qədimova bildirilib.

“Balıqçılıqla bağlı hədəflər var və bu hədəflərə uyğun olaraq görüləcək işlər müəyyən edilib. Sahibkarların qeydiyyatının sadələşdirilməsi və balıq istehsalının artırılması əsas hədəflərdəndir”, - Qədimova mətbuat konfransında deyib.

Onun sözlərinə görə, balıqçılıq sahəsində sui-istifadə hallarının qarşısının alınması və dövlət nəzarətinin gücləndirilməsi də prioritet istiqamətlər sırasındadır.

Azərbaycan Prezidenti İlham Əliyev avqustun 27-də yeni “Balıqçılıq haqqında” qanunu təsdiqləyib. Qanun balıqçılıq sahəsində dövlət nəzarəti, su bioresurslarının mühafizəsi, akvakultura və balıq istehsalının inkişafı üçün yeni hüquqi çərçivə müəyyən edir.

Qədimova bildirib ki, toxumçuluq sahəsində də qanunvericilik yenilənib və yeni yanaşmanın əsas məqsədlərindən biri özəl sektorun bu sahədə iştirakını genişləndirməkdir.
“Sertifikatlı toxumun artırılması da əsas hədəflərdəndir”, - nazir müavini bildirib.

Yeni “Toxumçuluq haqqında” qanun toxum istehsalı və dövriyyəsi ilə yanaşı, sertifikatlaşdırma və keyfiyyətə nəzarət mexanizmlərini də tənzimləyir. 2026-2030-cu illər üzrə dövlət proqramında özəl sektorun iştirakı ilə toxum istehsalının təşviqi və toxumçuluqda keyfiyyətə nəzarət sisteminin gücləndirilməsi nəzərdə tutulub.

Gülnar Nazimqızı