ADY sədri: Limanların rəqabət qabiliyyəti əməkdaşlıq və rəqəmsallaşmadan asılıdır

Limanların rəqabət qabiliyyətinin artırılmasında yalnız infrastrukturun və yük aşırma imkanlarının genişləndirilməsi deyil, qurumlararası əməkdaşlıq və rəqəmsal inteqrasiya da mühüm rol oynayır.

“Azərbaycan Dəmir Yolları” QSC-nin (ADY) sədri Rövşən Rüstəmov bunu Asiya və Sakit Okean Hövzəsi üzrə Qarşılıqlı Əlaqə və Etimad Tədbirləri üzrə Məşvərət (CICA) çərçivəsində keçirilən Liman Qurumlarının I İclasında çıxışı zamanı bildirib.

Rüstəmov qeyd edib ki, müasir dövrdə limanların səmərəli fəaliyyəti digər limanlarla koordinasiyadan, sistemlərin inteqrasiyasından və rəqəmsal məlumat mübadiləsindən birbaşa asılıdır.

O, regional əməkdaşlığın inkişafı baxımından üç əsas istiqaməti önə çəkib. Bunlar uzunmüddətli institusional əməkdaşlığın qurulması, CICA-ya üzv limanlar arasında qabaqcıl təcrübələrin bölüşülməsi, həmçinin rəqəmsallaşma və real vaxt rejimində məlumat mübadiləsinin genişləndirilməsidir.

ADY sədri tərəfdaş qurumlar arasında məlumat təhlükəsizliyinin təmin olunmasının vacibliyini də vurğulayıb. Onun sözlərinə görə, effektiv informasiya mübadiləsi mexanizmlərinin yaradılması ilə yanaşı, əməkdaşlığın konkret və real nəticələr verən layihələrə çevrilməsi əsas məqsədlərdən olmalıdır.
 

Aytac