“Azərkimya” yan məhsul kimi əldə olunan hidrogeni “Azerfloat”a satacaq

SOCAR-ın “Azərkimya” İstehsalat Birliyi istehsal prosesində yan məhsul kimi yaranan hidrogenin Sumqayıtda yerləşən “Azerfloat” şüşə zavoduna boru kəməri ilə nəqli və satışına hazırlaşır.

“Azərkimya”nın əməliyyatlar üzrə meneceri İlqar Qurbanov SOCAR-ın Etilen-Polietilen zavoduna media-tur zamanı bildirib ki, layihə sənədləri hazırlanıb və Fövqəladə Hallar Nazirliyindən müvafiq təsdiqlər alınıb.

“Hazırda hidrogenin nəql olunacağı boru xətlərinin çəkilişinə başlanılır”, — Qurbanov deyib.
Onun sözlərinə görə, indiyədək istehsal zamanı yan məhsul kimi alınan hidrogen məşəl sistemində yandırılırdı. Yeni layihə “Azərkimya” üçün əlavə gəlir yaratmaqla yanaşı, “Azerfloat” zavodunun istehsalının artırılmasına imkan verəcək.

Qurbanov bildirib ki, hidrogendən istifadə şüşə istehsalında karbon emissiyalarının azalmasına və daha aşağı karbon izinə malik məhsulların buraxılmasına şərait yaradacaq. Bu isə şirkətin məhsullarının Avropa bazarında rəqabət qabiliyyətini artıra bilər.

Layihə üzrə investisiyanın həcmi, “Azerfloat”a tədarük ediləcək hidrogenin miqdarı və satışın başlanacağı tarix açıqlanmayıb.

Sumqayıt Kimya Sənaye Parkında yerləşən “Azerfloat” Azərbaycanın ilk float üsulu ilə vərəqə şüşə istehsal edən zavodudur. 2021-ci ildə istifadəyə verilmiş müəssisənin illik istehsal gücü 90,000 ton və ya dörd millimetr qalınlığında təxminən doqquz milyon kvadratmetr şüşə təşkil edir.

Gülnar Nazimqızı