Almaniya səfiri: Azərbaycanla strateji gündəlik ikitərəfli əlaqələr üçün yeni çərçivə yaradır

Azərbaycan Prezidenti İlham Əliyevin iyul ayında Almaniyaya səfəri çərçivəsində imzalanmış strateji gündəlik iki ölkə arasında ikitərəfli əlaqələrin inkişafı üçün yeni siyasi çərçivə yaradır.

Bunu Almaniyanın Azərbaycandakı səfiri Dirk Lölke Bakıda keçirilən Almaniya-Azərbaycan Strateji Tərəfdaşlıq və Bağlantılar Konfransında deyib.

Səfir bildirib ki, Prezident İlham Əliyevin iyulun 20-21-də Berlində səfəri zamanı Federal Kanslerlə birlikdə strateji gündəlik imzalanıb. Onun sözlərinə görə, bu gündəlik təkcə bağlantı və enerji sahələrini deyil, müxtəlif digər sektorları, o cümlədən ilk dəfə müdafiə sənayesini də əhatə edir.

Dirk Lölke qeyd edib ki, hazırda strateji gündəliyin hər iki hökumət tərəfindən inkişaf etdirilməsi nəzərdə tutulur. Tərəflər özləri üçün prioritet olan mövzuları müəyyənləşdirərək qarşılıqlı müzakirələr aparacaq və əməkdaşlıq istiqamətlərini formalaşdıracaqlar.

Diplomatın sözlərinə görə, iqtisadi əlaqələrin inkişafı üçün əlverişli siyasi çərçivənin mövcudluğu mühüm əhəmiyyət daşıyır.

O, Azərbaycanın yerləşdiyi regionun bağlantı baxımından əhəmiyyətini vurğulamaqla yanaşı, regionda müəyyən risklərin də mövcud olduğunu bildirib. Səfir Ermənistanla sülh prosesinin davam etdirilməsinin regional sabitlik baxımından vacib olduğunu qeyd edib.

Dirk Lölke gələcək illərdə Almaniya ilə Azərbaycan arasında iqtisadi əlaqələrlə yanaşı, təhsil və səhiyyə kimi digər sahələrdə də əməkdaşlığın inkişaf etdirilməsinin nəzərdə tutulduğunu bildirib.

Aytac