Azərbaycanda 9 ayda 19,9 mln ton neft, 37,9 mlrd kubmetr qaz hasil edilib

2026-cı ilin yanvar-sentyabr aylarında Azərbaycanda 19,9 milyon ton neft (kondensatla birlikdə) və 37,9 milyard kubmetr təbii qaz hasil olunub.

Energetika Nazirliyinin operativ məlumatlarına əsasən, neft hasilatının 11,8 milyon tonu “Azəri-Çıraq-Günəşli” (AÇG), 2,6 milyon tonu “Şahdəniz”, 0,4 milyon tonu “Abşeron” yatağının, 5,1 milyon tonu isə SOCAR-ın payına düşüb. Dövr ərzində ixrac edilən 15,5 milyon ton neftin 14,2 milyon tonunu konsorsium, 0,8 milyon tonunu SOCAR, 0,5 milyon tonunu isə JOCAP reallaşdırıb. Ölkədə orta gündəlik hasilat 73 min ton (547 min barel), neft emalı isə 4,5 milyon ton təşkil edib.

Qaz hasilatında da əsas pay “Şahdəniz” (20,6 mlrd kubmetr) və AÇG-nin (10,8 mlrd kubmetr) olub; “Abşeron”dan 1,2 mlrd kubmetr, SOCAR üzrə isə 5,3 mlrd kubmetr hasilat qeydə alınıb.

Hesabat dövründə xaricə 18,4 milyard kubmetr qaz nəql edilib: Avropaya 8,6 mlrd, Türkiyəyə 7 mlrd (o cümlədən TANAP-la 4,2 mlrd), Gürcüstana 1,6 mlrd, Suriyaya isə 1,2 mlrd kubmetr çatdırılıb. AÇG və “Şahdəniz” istismara veriləndən cari ilin oktyabrın 1-dək ümumilikdə 684,5 milyon tona yaxın neft-kondensat və 540 milyard kubmetr qaz hasil olunub.

N. Təbrizli