Azərbaycanın bank sektorunun məcmu kapitalı 7,2 milyard manata çatıb

Azərbaycanın bank sektorunun məcmu kapitalı 2026-cı ilin ilk səkkiz ayında 4,7% artaraq 7,2 milyard manat təşkil edib. Bunu Mərkəzi Bankın sədr müavini Toğrul Əliyev risklərin idarə edilməsinə həsr olunan forumda bildirib.

Onun sözlərinə görə, sektorun kapital adekvatlığı göstəricisi 17,3% olmaqla Mərkəzi Bankın minimum tələbini üstələyib. Likvidliyin örtülmə əmsalı sektor üzrə 164%, milli valyutada isə 138% təşkil edib. Hər iki göstərici minimum tələblərdən yüksək olub.

“Azərbaycanın bank sektoru riskləri aşkar etmək, ölçmək, nəzarətdə saxlamaq üçün mütərəqqi metodologiyalara, modellərə, idarəetmə çərçivələrinə malikdir və dayanıqlıdır”, — Əliyev deyib.

Bununla yanaşı, o, geosiyasi gərginliklərin, makroiqtisadi qeyri-müəyyənliyin, texnoloji transformasiyanın, kibertəhlükələrin və maliyyə cinayətlərinin bir-biri ilə əlaqəli risklər yaratdığını vurğulayıb.

“Risk funksiyası artıq yalnız qərarların təhlükəsizliyini qiymətləndirən deyil, onların keyfiyyətini formalaşdıran, yalnız mümkün itkiləri məhdudlaşdıran deyil, strateji seçimlərin daha sağlam əsaslarla edilməsinə töhfə verən bir funksiyadır”, — sədr müavini bildirib.

Əliyevin sözlərinə görə, böhranlara hazırlıq, əməliyyat dayanıqlılığı, kibertəhlükəsizlik, fırıldaqçılıqla mübarizə, kredit risklərinin model əsaslı təhlili və rəqəmsal aktivlərlə bağlı risklər vahid risk idarəetmə sisteminin tərkib hissələri kimi nəzərdən keçirilməlidir.

O bildirib ki, Mərkəzi Bank bu çağırışlara cavab olaraq makroprudensial siyasət çərçivəsi, risk əsaslı nəzarət üzrə siyasət konsepsiyası, nəzarət texnologiyaları — “SupTech” üzrə yol xəritəsi və dayanıqlı maliyyə üzrə yol xəritəsi daxil olmaqla bir sıra strateji sənədlər qəbul edib.

Mərkəzi Bankın xüsusi tənzimləmə rejimi isə maliyyə institutlarına və fintex şirkətlərinə innovativ xidmətləri müəyyən müddət ərzində nəzarət altında real müştərilərlə sınaqdan keçirməyə imkan verir. Əliyev bu mexanizmin yeni məhsullarla bağlı risklərin idarə olunmasına xidmət etdiyini bildirib.
 

N.Təbrizli