Banklar Assosiasiyası problemli kreditlərlə bağlı təşəbbüslər qaldırıb

Azərbaycan Banklar Assosiasiyası (ABA) problemli kreditlərin həlli üçün hökumət səviyyəsində təşəbbüslər irəli sürüb və onların qısa müddətdə nəzərdən keçirilməsini gözləyir. Bu barədə assosiasiyanın rəhbəri Zakir Nuriyev risklərin idarə edilməsinə həsr olunmuş forumda bildirib.

Onun sözlərinə görə, bank sektorunda qeyri-işlək kreditlərin ümumi kredit portfelində payı oktyabrın 1-nə 2,8% təşkil edib. O, problemli kreditlərin həcmindəki artımı kreditləşmənin genişlənməsi ilə əlaqələndirib və bəzi media orqanlarında səsləndirildiyi kimi kəskin artım olmadığını deyib.

“Lakin bu bizi qane edirmi? Xeyr, bu bizi qane etmir”, — Nuriyev bildirib.

O qeyd edib ki, assosiasiya Mərkəzi Bank və digər dövlət qurumları ilə birlikdə problemin həlli istiqamətində addımların atılması üçün təşəbbüslərlə çıxış edib.

“Hökumət səviyyəsinə qaldırdığımız bu təşəbbüslərə ən qısa zamanda baxılması və zamanında zəruri tədbirlərin görülməsi üçün bizimlə yaxın əməkdaşlığın davam etdiriləcəyini düşünürük”, — o deyib.

Çıxışda təşəbbüslərin məzmunu və hansı konkret tədbirlərin təklif olunduğu açıqlanmayıb.

ABA nümayəndəsi bank sektorunun risklərinin yalnız kredit əməliyyatları ilə məhdudlaşmadığını, sürətlə inkişaf edən ödəniş sistemlərinin də yeni çağırışlar yaratdığını vurğulayıb. Onun sözlərinə görə, kibertəhlükələr, fırıldaqçılıq və rəqəmsal maliyyə xidmətləri ilə bağlı risklərə xüsusi diqqət yetirilməlidir.

O, həmçinin bildirib ki, bankların “Bazel III” kapital tələblərinə tam uyğunluğu 2027-ci il yanvarın 1-dən tələb olunacaq. Yeni yanaşmaların tətbiqində məlumatların keyfiyyəti və risk modellərinin etibarlılığı həlledici rol oynayacaq.

N.Tebrizli