Dövlət Neft Fondunun gəlirləri 12,3 milyard manatı ötüb

Azərbaycan Dövlət Neft Fondunun (ARDNF) 2026-cı ilin yanvar-sentyabrda büdcə gəlirləri 12 milyard 341,3 milyon manat, xərcləri isə 9 milyard 681,2 milyon manat təşkil edib. Bu dövrdə Fondun dövlət büdcəsinə transfertləri 9 milyard 628 milyon manat olub. Bu barədə ARDNF-in məlumatında bildirilib.

Məlumata görə, oktyabrın 1-nə Fondun aktivləri 74 milyard 4 milyon ABŞ dollarına çatıb. Bu, 2026-cı il yanvarın 1-i ilə müqayisədə 0,6% çoxdur.

Hesabat dövründə Fondun neft-qaz gəlirləri 8 milyard 740,6 milyon manat, aktivlərin idarə olunmasından əldə etdiyi gəlirlər isə 3 milyard 600,7 milyon manat olub.

Doqquz ay ərzində mənfəət neft-qazının satışından 7 milyard 343,9 milyon manat, bonus ödənişləri və tranzitdən 0,9 milyon manat, akr hesabı ödənişlərdən isə 4,9 milyon manat gəlir əldə edilib.

Fondun gəlirlərinin əsas hissəsi “Azəri-Çıraq-Günəşli” və “Şahdəniz” yataqlarından daxil olub. Belə ki, birinci yataqdan 6 milyard 570,6 milyon manat, ikinci yataqdan isə 565,1 milyon manat vəsait əldə edilib.

Bununla yanaşı, Fondun qızılın qiymətinin dəyişməsi və valyuta məzənnələri üzrə fərqlərlə bağlı büdcədənkənar xərcləri 1 milyard 874 milyon manat təşkil edib.

ARDNF hesabat dövründə ali təhsil proqramlarının maliyyələşdirilməsinə də vəsait ayırıb. Belə ki, 2019–2023-cü illər üçün ali təhsil sisteminin beynəlxalq rəqabətliliyinin artırılması üzrə Dövlət Proqramına 3,6 milyon manat, 2022–2028-ci illər üçün gənclərin xarici ölkələrin nüfuzlu ali təhsil müəssisələrində təhsil almasına dair Dövlət Proqramına 21,9 milyon manat, beynəlxalq ikili diplom proqramlarına isə 2,2 milyon manat xərclənib. Fondun idarəetmə xərcləri 25,5 milyon manat olub.

Gülnar Nazimqızı