Əli Məsimli qiymət artımı riskinə diqqət çəkib

Azərbaycanda nağdsız ödənişlərin genişləndirilməsinə yönələn qanunvericilik dəyişiklikləri tətbiq edilərkən onların istehlakçı hüquqlarına və qiymətlərə mümkün təsiri nəzərə alınmalıdır. Bunu deputat Əli Məsimli deyib. 

Deputat  bildirib ki, təklif olunan dəyişikliklər kölgə iqtisadiyyatının azalmasına müsbət təsir göstərə bilər, lakin onların səmərəli tətbiqi üçün məsələyə kompleks yanaşmaq lazımdır.

“Dövrünə görə kölgə iqtisadiyyatının da müəyyən dərəcədə daralmasına müsbət təsir göstərəcək. Amma eyni zamanda bu məsələyə kompleks yanaşılması ümumi işin xeyrinə olar”, - o bildirib.

Məsimli regionlarda elektron ticarət sahəsində mövcud problemlərə və POS-terminalların sayının az olmasına diqqət çəkib. O, bu şəraitdə təklif olunan dəyişikliklərin nə dərəcədə səmərəli işləyəcəyinin araşdırılmasının vacib olduğunu deyib.

Deputat, həmçinin qanunvericilik dəyişikliklərinin istehlakçıların hüquqlarına təsirinin qiymətləndirilməsini zəruri sayıb.

O hesab edir ki, bu sahədə problemlərin həlli üçün Azərbaycanda startapların sayının artırılması və onların səmərəli fəaliyyəti üçün əlverişli şəraitin yaradılması da əhəmiyyətlidir.

Gülnar Nazimqızı