Orta Dəhliz daşımaları üçün yeni konteyner gəmiləri 2027-ci ildə istismara verilə bilər

Xəzər dənizində Orta Dəhliz vasitəsilə yükdaşımaların həcminin artırılması üçün daha böyük tutumlu konteyner gəmilərinin 2027-ci ildə istismara verilməsi gözlənilir.

Bunu Azərbaycan Ekspeditor Şirkətləri Assosiasiyasının İdarə Heyəti sədrinin müavini Elmir Poladov Azərbaycan–Avropa İttifaqı Biznes Forumunda bildirib.

Onun sözlərinə görə, hazırda Xəzər dənizində bərə və Ro-Ro gəmiləri ilə yanaşı, kiçik tutumlu konteynerdaşıyan gəmilər də fəaliyyət göstərir. Yeni, daha böyük tutumlu konteyner gəmilərinin inşası isə daşımaların genişləndirilməsi baxımından əhəmiyyət daşıyır.

Poladov Orta Dəhliz boyunca nəqliyyat infrastrukturunun inkişafı istiqamətində görülən işlərə də diqqət çəkib. O qeyd edib ki, Bakı–Tbilisi–Qars dəmir yolu xəttinin ötürücülük qabiliyyəti illik 5 milyon tona çatdırılıb, Ələt limanının genişləndirilməsi layihəsi isə davam etdirilir.

Assosiasiya rəsmisi bildirib ki, Azərbaycanda yükdaşımalarla bağlı prosedurların sadələşdirilməsi məqsədilə milli “bir pəncərə” sisteminin yaradılması istiqamətində də iş aparılır.

Poladovun sözlərinə görə, həyata keçirilən layihələrin əsas məqsədi bütün mexanizmləri vahid sistemdə birləşdirmək, yük sahibləri üçün Orta Dəhliz boyunca fasiləsiz və əvvəlcədən proqnozlaşdırıla bilən daşımaları təmin etməkdir.

Aytac