Ekspert: Dünyada ən bahalı kartof Azərbaycandadır

Bu barədə Kənd Təsərrüfatı Nazirliyindən məlumat verilib.  Bəs Azərbaycanda kartof istehsalının azalması bazarlarda tərəvəzin bu növünün qiymətlərinə hansı şəkildə təsir göstərəcək?

Məsələ ilə bağlı Oxu.Az-a açıqlama verən kənd təsərrüfatı üzrə ekspert Vahid Məhərrəmov bildirib ki, dünyanın heç bir ölkəsində kartofun qiyməti ölkəmizdəki kimi baha deyil:

"Türkiyədə, İranda, Rusiyada 1 kiloqramı 5-10 qəpiyə alınan kartof ölkə bazarında 70-80 qəpiyə təklif olunur. Rusiya isə özünün istehsal tələbindən iki dəfə çox məhsul istehsal edir. Ona görə də bu ölkələrdə kartofun qiyməti ucuzdur”.

Ekspert kartof istehsalının azalmasının səbəblərinə də toxundu:

"Ənənəvi sortlar sıradan çıxarılıb və yeni sortlar yaradılmayıb. Ölkədə kartof istehsalı ilə məşğul olan fermerlər ərzaq üçün nəzərdə tutulan kartof yumrularını toxum kimi istifadə edirlər. Bu da yolverilməzdir. Ona görə ki, toxumçuluq üçün xüsusi sahələr olmalıdır, orda aqrotexniki qaydalara riayət etmək lazımdır. Biz bu sektorda toxumçuluqla məşğul olmadığımıza görə, bu sahə get-gedə geriləyir. Əvvəllər daha çox sahələrdə kartof yetişdirmklə müəyyən həcmdə kartof istehsal olunurdusa, indi bunu həyata keçirmək mümkün deyil. Ona görə ki, məhsuldarlığın azalması fermerin biznesinə zərəri artırır və fermer növbəti ildə kartof istehsalında maraqlı olmur”.

İstehsalın həcmini artırmaq üçün ekspert həll yollarını təklif edir:

"Artıq əkin sahələrini genişləndirməklə bu sahəni inkişaf etdirmək mümkün deyil və fermerlər onda maraqlı deyillər. Ona görə də, bizdə istehsal get-gedə azalacaq, hansı bölgələrdə kartofçuluğu inkişaf etdirmək olar orda suvarma ilə bağlı mövcud olan problemlər aradan qaldırılmaldır. Aqro-texniki qaydalara tam əməl olunması üçün fermərləri lazımi istehsal alətləri ilə təmin etmək, bu sahə ilə məşğul olan fermerlərin biznesini genişləndirmək, məhsuldarlığı artırmaq üçün onların qarşısında duran problemləri həll etmək, onlara aşağı faiz dərəcəsi ilə kreditlərin verilməsini təşkil etmək lazımdır”.

Vahid Məhərrəmov bazarlarda kartofun bahalaşmasının nə vaxta qədər davam etməsinə də aydınlıq gətirdi:

"Əlbəttə, hər bir istehlakçını məhz bu sual maraqlandırır. Azərbaycan nə vaxta qədər ki tələbatını ödəyə bilməyək, bazarlarda qiymətlər o formada qalacaq. Bazarlarda qiymət artımı müşahidə ediləcək, amma yenə də birmənalı demək olmaz  ki, kartofun qiyməti nə vaxt enəcək”- ekspert bildirdi. 

Xatırladaq ki, Dövlət Statistika Komitəsinin 2015-ci ilin yanvar ayının məlumatına görə, ötən ay ərzində kartofun qiyməti 0.7% bahalaşıb.