Azərbaycanda mobil rabitə tarifləri artacaqmı?

Əgər Azercell Telekom tərəfindən həyata keçirdiyi xidmətlərinə görə hər hansı bir qiymət dəyişikliyi olarsa, ictimaiyyət bu barədə əvvəlcədən məlumatlandırılacaqdır. Hal-hazırda bu məsələ ilə bağlı şirkətin başqa heç bir şərhi yoxdur.

Bu barədə Azercell Telekom-un mətbuat xidmətindən Oxu.Az-ın manatın ucuzlaşması danışıq tariflərinin artmasına səbəb ola bilərmi sualını şərh edərkən bildirdilər.

Öz növbəsində məsələ ilə bağlı Azerfon MMC (Nar Mobile ticarət nişanı) şirkətinin də mövqeyni öyrəndik.

"Manatın devalvasiyasının mobil rabitə bazarına təsirindən danışsaq qeyd etməliyik ki, İndiki vəziyyətdə hər hansı bir bəyanatla çıxış etmək tezdir, çünki bu dəyişikliyin səbəbilərini anlamaq və təsirləri araşdırmaq lazımdır.

Lakin böyük ehtimalla qeyri-müəyyən iqtisadi vəziyyət və yüksək inflyasiya olarsa, müştərilər qısa müddət üçün olsa da belə, mobil rabitə xərclərini dəyişəcəklər” - deyə, şirkətin media əlaqələri üzrə mütəxəssisi Ceyhun Ələkbərov bildirdi.

Ceyhun Ələkbərovun sözlərinə görə, dəyən təsirləri araşdırdıqdan sonra alternativ addımlar atılacaq:

"Bizim xərclərimizin böyük əksəriyyəti artıq manatla müəyyən edilib. Hazırda hansı təsirlərə məruz qala biləcəyimiz barədə ehtimallar edirik. Hansı təsirlərlə üzləşəcəyimizi daha dəqiq anladıqdan sonra, alternativ variantlar üzərində çalışacağıq”.

Hazırda isə "Azerfon”  (Nar Mobile) tariflərin qaldırılması məsələsini nəzərdən keçirmir - deyə, şirkətin nümayəndəsi bildirdi.    

Azərbaycanın daha bir mobil rabitə operatoru olan Bakcell şirkətindən məsələ ilə bağlı bildirdilər ki, hal-hazırda tariflərin bahalaşacağı ilə bağlı heç bir məlumat yoxdur:

"Hər hansı dəyişiklik baş verərsə Bakcell-in rəsmi internet səhifəsində və kütləvi informasiya vasitələrində bu məlumat təqdim olunacaq”.

ANN.Az