Musiqili Teatrda “Amerikalı kürəkən”in yeni quruluşda premyerası olacaq

 

Qurumun Mətbuat katibi Samir Sədaqətoğlu bildirib ki, tamaşanın quruluşçu-rejissoru Azərbaycan Respublikasının Xalq artisti, "Şöhrət” ordenli İlham Namiq Kamaldır. "Amerikalı kürəkən”in yeni quruluşunun diqqət çəkən məqamlarından biri də müğənni kimi geniş tamaşaçı kütləsinin sevgi və rəğbətini qazanan Əməkdar artist Almaz Ələsgərlinin bu səhnə əsərində əsas qəhrəmanlardan birini – Tunzalə obrazını canlandırmasıdır.  Tunzalə qızı Reyhanı varlı bir adama ərə vermək istəyir. Reyhan isə kasıb ingilis dili müəllimi olan Kamranı sevir. Gənc sevgililər Tunzalə xanımın var-dövlət hərisliyinin onları ayıracağını görüb kələk qururlar. Məhz bu kələk nəticəsində Tunzalə xanımın bütün planları alt-üst olmaqla yanaşı, bir çox qaranlıq mətləblərə aydınlıq gəlir. Komik və gözlənilməz situasiyalardan ibarət bu maraqlı əhvəlat bütün maneələrə baxmayaraq əsl sevginin, məhəbbətin qələbəsi ilə yekunlaşır...

 

Qeyd edək ki, Əməkdar artist Almaz Ələsgərli Azərbaycan Dövlət İncəsənət İnstitutunun "Musiqili komediya aktyorluğu” fakültəsini bitirib. İlk dəfə 1985-ci ildə - tələbə ikən məhz Musiqili Teatrda səhnəyə çıxıb və Emin Sabitoğlu və Xalidə Hasilovanın "Nəğməli könül” əsərində baş qəhrəmanı – Könül obrazını canlandırıb. Sonra uzun müddət teatrdan uzaq düşən Almaz xanım əsasən müğənnilik fəaliyyəti ilə məşğul olub. Bu yaxınlarda yenidən teatra qayıdıb və  artıq Azərbaycan Dövlət Musiqili Teatrın aktrisasıdır.

 
"Amerikalı kürəkən” iki hissəli musiqili komediyasının quruluşçu-drijoru Əməkdar incəsənət xadimi Nazim Hacıəlibəyov, quruluşçu-rəssamı Nabat Səmədova, quruluşçu-baletmeysterləri Leyla və Zakir Ağayevlər, şeirlərin müəllifi Xalq şairi Fikrət Qoca, xormeysteri Əməkdar artist Vaiqf Məstanov, drijoru Fəxrəddin Atayev, konsertmeysteri Nərminə Əbdürəhmanova, rejissor assistenti Tamilla Aslanovadır.  Tamaşada rolları Xalq artistləri İlham Namiq Kamal, Fatma Mahmudova, Əməkdar artistlər Novruz Qartal, Almaz Ələsgərli, Əkbər Əlizadə, aktyorlar Məhərrəm Qurbanov, Rəsmiyyə Nurməmmədova, Səməd Xasıyev, Pərviz Məmmədov, Gültac Əlili, Ağaxan Şərifov, Ruslan Mürsəlov, Gülnarə Əzizova, Gülçöhrə Abdullayeva, Nigar Qarayeva və Gülnarə Kərimbəyova ifa edirlər.