“Panama Papers” qalmaqalı Hollywood filminə çevrilir

"Panama Papers” qalmaqalı Hollywood filminə çevrilir

"Panama Papers” maliyyə qalmaqalı axır ki, Hollywooda yol tapıb. "Reuters” bildirir ki, iki alman araşdırmaçı jurnalistin kitab halına saldığı araşdırmalar yaxınlarda "Netflix” film şirkəti tərəfindən tanınmış prodüsser John Wells-in başçılığı ilə filmə çevriləcək.

Bu həmin mövzuda çəkilmiş 4-cü film olacaq və aprel ayında Panamada yerləşən "Mossack Fonseca” hüquq şirkətinin vasitəsilə dünyanın müxtəlif yerlərində vergidən yayındırılan pulların anonim şirkətlərin köməyi ilə oğurlanmasını sübut edən sənədlərin yayılmasından sonra rejissorların diqqətini çəkməkdədir.

Bu ayın əvvəlləri amerikalı rejissor Steven Soderbergh də jurnalist Jake Bernstein-in çapa hazırlanan "Dünyanın sirrləri” adlı başqa bir kitabın əsasında "Panama qalmaqalı” haqda film çəkəcəyini bildirmişdi.

"Netflix” şirkəti bildirib ki, alman jurnalistləri Frederik Obermaier və Bastian Obermayer-in yazılarından ibarət, iyun ayında çıxmış "Panama Papers: Dünyanın varlı və güclü adamlarının pullarını harda gizlətdiyinin aşkarlanması” adlı kitablarının müəlliflik hüququnu artıq alıb.

"Netflix” təmsilçisi Ted Sarandos bildirib ki: Film "macəravi əhvalatları əks etdirəcək”. "Panama Papers” layihəsində çalışmış beynəlxalq jurnalistlər konsorsiumunun üzvləri də film üzərində işləyəcək. (Azadliq.org)