İstanbulun mərkəzində cənnət guşəsi - FOTOLAR

Türkiyənin ən böyük şəhəri, əsas limanı, ticarət mərkəzi İstanbul artıq lap çoxdandır meqapolisdir və şəhərin sərhədləri, əhalisi də gün keçdikcə böyüyür. Ancaq bu səs-küylü meqapolisin düz ortasında elə bir cənnət guşəsi var ki, sakitliyi, dincliyi ilə insanları sərməst edir. Şəhərin səs-küyündən, tüstü-dumanından yorulanlar bu parka üz tuturlar. Bura şəhərin tarixi məkanlarından olan Eminönü rayonunda yerləşən, əfsanəvi Osmanlı sultanları sarayı Topkapının yaxınlığındakı Gülhane parkıdır. Parkın adının haradan gəlməsi də maraqlıdır, burada uzun müddət ecazkar güllər yetişdirilib, Gülhane, yəni Gülxana. 

Parkı tapmaq çətin deyil, şəhərin mərkəzindəki işarələr vasitəsilə də onu tapmaq mümkündür.  

Biraz parkın tarixi barədə. Osmanlı imperiyası dövründə Gülhane parkının yerində Topkapı sarayının bağları yerləşib və onun böyük hissəsini ağaclar təşkil edib. 1839-cu ildə sarayın bağında Gülhane müqaviləsi imzalanıb. Sazişin imzalanmasında məqsəd imperiyanı modernləşdirəcək Tanzimat islahatlarına başlamaq olub: sazişdə göstərilirdi ki, imperiyanın təbəələri etnik və dini inanclarından asılı olmayaraq, hüquq və öhdəliklər baxımından bərabərdirlər. Sazişin mətnini görkəmli dövlət xadimi, diplomat və islahatçı böyük vəzir Mustafa Rəşid paşa imzalayıb. 

XX əsrdə bələdiyyənin qərarıyla bağın bir hissəsi parkın qurulması üçün ayrılıb və 1912-ci ildə ictimaiyyətə açıq elan edilib. Əvvəllər parkın ərazisində istirahət guşələri, kafelər, oyun meydançaları olub, həmçinin yarmarkalar keçirilib. Sonradan Gülhanedə balaca zoopark açılıb, 1926-cı ildə Türkiyədə ilk dəfə olaraq, Atatürkün heykəli burada qoyulub. 

Son dövrlərdə park bir çox dəyişikliklərə məruz qalıb. Məsələn, bağdakı piknik yerləri və zoopark ləğv edilib, yarmarkalara son verilib, bunun da nəticəsində parkın ərazisi xeyli genişlənib. beton konstruksiyaların ləğvi nəticəsində park öz təbii landşaftına qovuşub və 1800-cü illərdə əkilən ağaclar indi daha yaxşı görünür. 

Parkın qərb qurtaracağında Topkapı sarayının bir vaxtlarkı geniş at tövlələrinin yerində indi İstanbul islam elmi və texnikası muzeyi yerləşir, parkın açılışını 2008-ci ildə Rəcəb Tayyib Ərdoğan edib. Muzeydə VIII-XVI əsrlərin astronomiya, coğrafiya, kimya, geodeziya, optika, tibb, fizika və hərb sənətinə dair 140 nümunə sərgilənir. 

Gülhane parkı bir təpənin başında yerləşir, buradan isə Bosfora və Qızıl buynuz buxtasına möhtəşəm bir mənzərə açılır. 

Parkın ərazisindəki skamyalardan başqa, istirahət edənlər balaca besedkalarda da dincələ bilərlər. 

 

Hər ilin aprel ayında Gülhane parkında zanbaqlar festivalı keçirilir, bu da şəhərdəki əsas bayramlardan birinə çevrilir, bu park təkcə gözəl deyil, həm də olduqca təmiz və komfortludur. 

Oxucularımıza Gülhane parkından fotosessiyanı təqdim edirik. 

Xoş seyrlər: