Kventin Tarantino karyerasını bitirir - QƏRAR

Filmləri ilə kino dünyasına yeni nəfəs gətirən Kventin Tarantino karyerasını sonlandırmaq qərarına gəlib. Məşhur rejissor vizyona girməsi planlaşdırılan “The Hateful Eight” filmindən sonra təqaüdə çıxacağını bildirib. 

Qanlı səhnələrin ustası fanatlarını təəssüfləndirəcək açıqlama verib: “Tamaşaçı qovmadığı müddətcə davam etmək fikrinə inanmıram. Bu məsələdə fərqli düşüncəyə sahib olanları qınamıram, amma sağlam və güclü vəziyyətdə ikən karyeramı yekunlaşdırmaq istəyirəm. Məncə, rejissorluq gənc işidir. Rejissorluğa başlayanda məqsədim 10 yaxşı film çəkmək idi. Qoyulan hədəfdən iki film də çox çəkib məqsədimə çatdım. İlk filmimlə son filmim arasında göbək bağı var. Elə buradaca karyeramı nöqtələmək yaxşı fikir kimi görünür. Təqaüdə çıxdıqdan sonra teatr tamaşaları hazırlayacaq, kitab yazacağam”. 

Bir müddət əvvəl Tarantinonun “The Hateful Eight” adını verdiyi son filminin ssenarisi internetə sızmış və o, bütün işi dayandırıb filmi çəkməyəcəyini bildirmişdi. Ssenarini sızdıranın komandasından birinin olduğunu biləndə həmin adamla yanaşı şübhələndiyi daha altı nəfəri də işdən qovmuşdu. Ancaq qısa müddət keçdikdən sonra filmin çəkilişlərini davam etdirmişdi. Tarantinonun karyerasını yekunlaşdırmaq istəyinin bu hadisə ilə bağlı olduğu düşünülür. 

1963-cü ildə ABŞ-ın Tennesi ştatının Noksvil şəhərində doğulan Tarantino rejissor, ssenarist, aktyor kimi tanınır. 1995-ci ildə “Kriminal qiraət”, 2013-cü ildə “Zəncirsiz Canqo” filmlərinə görə “Ən yaxşı ssenarist” nominasiyası üzrə “Oskar” mükafatını qazanıb.  Eyni illərdə, eyni filmlərə görə “Bafta” mükafatının “Ən yaxşı ssenarist” nominasiyası üzrə birinci olub. Aktyor kimi başqa rejissorların filmləri ilə yanaşı öz çəkdiyi filmlərin də əksəriyyətində epizodik rollarda çıxış edib. Buna görə də “kameo” dedikdə ilk ağıla gələn rejissorlardan biridir. 

Kult.az