Məşhur İsrail yazıçısının romanı Bakıda çap edildi

Məşhur İsrail yazıçısı Amos Ozun "Mənim Mixaelim” romanı ilk dəfə Azərbaycan dilində çap olundu.

"Alatoran" Yayınlarının nəşr etdiyi “Mənim Mixaelim” Beynəlxalq Naşirlər Assisoaisiyasının (International Publishers Association) "XX əsrin 100 ən yaxşı romanı" siyahısına daxil edilib. Oz bir çox mükafatların, o cümlədən prestijli sayılan Kafka mükafatının laureatıdır.

Romanda hadisələr 1950-ci illərdə - İsrail dövlətinin qurulduğu illərdə cərəyan edir. Əsər Hanna Qonenin dilindən danışılır və onun Mixaellə tanışlığından başlanır.

Hanna universitet tələbəsi olduğu illərdə Mixaaellə - geologiya fakültəsinin aspirantıyla tanış olur və onlar evlənirlər. Hanna gecələr gec saatlaradək elmi işləriylə məşğul olan bu soyuq təbiətli insanla illərini paylaşır, öz karyerasını qurban verir, uşaq tərbiyə edir, xəstəliklə mübarizə aparır. Amos Oz yaşayıb-yaşamayacağı bəlli olmayan bir nikahın tarixçəsini yazır. Müstəqilliyi sual altında olan ölkənin taleyi ilə əvvəldən-axıra paralel təşkil edən süjetdə oxucu Hannanı öz müstəqilliyindən ötrü mübarizə aparan görür, zahirən məişət səviyyəsində görünən hadisələr tarixi kontekst qazanır.

Büsbütün depressiyaya uğramış olan Hanna get-gedə daha səbatsız olur. Hannanın nikahı və sağlam düşüncəsi zəiflədikcə, müəllifin simvolları daha dərin mənalar qazanır və universallıq kəsb edir.

Hanna faciə qəhrəmanıdır, qrotesk varlqıdır, ustalıqla yaradılmış qadın xarakteridir. O, zəhmətkeş insan olan, ailəsinə dəyər verən və öz sahəsində önəmli uğurlar qazanan ərini qiymətləndirə bilmir. Maykldan fərqli olaraq, Hanna uşaq doğduqdan sonra təhsilini yarımçıq saxlayır, davam etmək haqqında heç düşünmür də. Gününü şirin xəyallarda keçirməklə məşğul olur, özünü kraliça kimi təsəvvür edir... Azərbaycan oxucusu bir yəhudi ailəsində özünə bənzəyən məqamları görüb heyrət edəcəkdir, şübhəsiz.

“Mənim Mixaelim” romanının avtobioqrafik olduğunu da söyləyirlər. Ozun “Qaranlıq və Eşq” avtobioqrafik əsərində də (gələcəkdə “Alatoran Yayınları”nda çap olunacaq) “Mənim Mixaelim” romanına paralellər tapmaq mümkündür.

Azadliq.org