Tahir İmanov qardaşının vəfatından sonra izləyicilərinə müraciət edib

Azərbaycanın əməkdar artisti, “Planet Parni iz Baku” teatrının bədii rəhbəri Tahir İmanov mərhum əməkdar artist Cabir İmanovun  vəfatından sonra sosial şəbəkədə – Instagram hesabında izləyicilərinə müraciət edərək onu dəstəkləyənlərə təşəkkürü , qardaşını tənqid edənlərə isə cavab verəcəyini bildirib. 

O, ailəsinə bu ağır günlərdə dəstək göstərən hər kəsə təşəkkür edib.

“Bu ağır sınaq günlərində bizimlə olan, bizi tək qoymayan hər bir kəsə , sadə vətəndaşlardan tutmuş məmurlara, kasıblardan tutmuş imkanlı insanlara qədər təşəkkür edirəm. Allah sizi və ailələrinizi qorusun”, - o yazıb.

İmanov, həmçinin, bir çox dövlət qurumlarının da ailəsinə dəstək göstərdiyini vurğulayıb və onlara minnətdarlığını ifadə edib.

Sənətçi əlavə edib ki, yaxın günlərdə “xaricdə yaşayan bəzi  jurnalist və bloqerlərin reaksiyası” barədə ayrıca video paylaşacaq.

“Sağ olun, var olun. Allah xalqımızı, millətimizi və ölkəmizi qorusun,” –  o müraciətində vurğulayıb.

N.Təbrizli