Ərdoğan: İran böhranı ilə bağlı bütün ehtimalları nəzərdən keçiririk

Türkiyə Prezidenti Recep Tayyip Erdoğan bildirib ki, ölkə rəhbərliyi Nazirlər Kabinetinin iclasında İranla bağlı yaranmış böhranı müzakirə edib.

Dövlət başçısı Türkiyənin 28 fevraldan etibarən yüksək hazırlıq vəziyyətində olduğunu qeyd edib.

“Biz heç bir ehtimalı göz ardı etmirik. Əsas məqsədimiz ölkəmizi bu yanğından uzaq saxlamaqdır. Türkiyənin təhlükəsizliyini və 86 milyon vətəndaşın əmin-amanlığını təmin etmək bizim üçün ən böyük həssaslıqdır”, –  o bildirib.

Ərdoğan vurğulayıb ki, Türkiyə dövləti və hökuməti heç bir halda aciz vəziyyətdə deyil.
“Türkiyə Respublikası hər sahədə güclüdür və dövlətimizin təhlükəsizliyinə yönələn hər cür hücumu dəf etmək gücünə malikdir”, – Türkiyə prezidenti əlavə edib.

Onun sözlərinə görə, F-16 qırıcıları, erkən xəbərdarlıq və tanker təyyarələri vasitəsilə Türkiyə hava məkanı sutkada 24 saat müşahidə olunur.

Ərdoğan bildirib ki, İrana lazımi xəbərdarlıqlar edilib və yanlış addımlarda israr edilməməlidir.
Türkiyə lideri qeyd edib ki, səmimi çağırışlara baxmayaraq, Ankaranın dostluğunu çətin vəziyyətə sala biləcək yanlış və təxribat xarakterli addımlar atılmaqda davam edir.

O əlavə edib ki, minillik qonşuluq və qardaşlıq münasibətlərinə kölgə sala biləcək addımlardan çəkinilməlidir.