"British Council" Azərbaycan mədəniyyətinə töhfə verəcək

Fevral 24-də ölkəmizdə fəaliyyət göstərən Böyük Britaniyanın "British Council” təşkilatı Mədəniyyət və Turizm Nazirliyi, eləcə də Milli İncəsənət Muzeyi ilə birgə əməkdaşlıq çərçivəsində Azərbaycan muzeylərində fəaliyyət göstərən mütəxəssislərin inkişafı, eləcə də muzeylərə ictimai marağının artırılması sahəsində uzunmüddətli layihə reallaşdırmaq məqsədilə "dəyirmi masa” keçirib.

"British Council” təşkilatından AzərTAc-a bildirilib ki, Milli İncəsənət Muzeyində baş tutan tədbirdə layihə barədə məlumat verilib.

Bildirilib ki, "British Council”un muzey, kitabxana və arxiv sahəsi üzrə regional məsləhətçisi Ceyn Viksi və bu sahə üzrə digər mütəxəssis Coanna van Mil layihə çərçivəsində Azərbaycan muzeylərinin mövcud vəziyyətini, problemlərini müzakirə edəcək və Bakının müxtəlif muzeylərindən olan mütəxəssislərlə görüşəcəklər. Bunun nəticəsində gələcək fəaliyyətlərin müəyyən edilməsi və səmərəli təlim proqramının hazırlanması üzərində işlər aparılacaq.

Tədbirdə mədəniyyət və turizm nazirinin müavini Sevda Məmmədəliyeva bu layihənin mədəni irsimizin qorunmasına əvəzsiz töhfə verəcəyini və Birləşmiş Krallıqla Azərbaycan arasında mədəni sahədə əməkdaşlığımız yüksələn xətt üzrə davam etdirildiyini söyləyib.

Tədbirdə Böyük Britaniyanın Azərbaycandakı səfiri İrfan Siddiq iştirak edib.