“Azərbaycana yeni birgə layihələr təklif ediləcək”

 ATƏT/DTİHB-nin direktoru: "Azərbaycana yeni birgə layihələr təklif ediləcək”

Bakı. Türbət Bağırova - APA. "Dağlıq Qarabağ dövlət kimliyinə malik deyil, ona görə də bizi seçkiləri müşahidə üçün dəvət edə bilməz. Bizim üçün mütləq aydın olan bir məsələ var: biz beynəlxalq hüquqi status-kvonu və beynəlxalq səviyyədə tanınmış sərhədləri dəstəkləyirik”.

 

APA-nın "vestikavkaza.ru” saytına istinadən verdiyi xəbərə görə, bu barədə ATƏT-in Demokratik Təsisatlar və İnsan Haqları Bürosunun (DTİHB) direktoru Maykl Link Almaniya Xarici Siyasət Cəmiyyətində keçirilən müzakirələrdə Qarabağ separatçılarının nümayəndəsinə cavabında deyib.

 

ATƏT/DTİHB  və Azərbaycan arasında münasibətlərin perspektivləri barədə danışan M. Link  Azərbaycanla dialoq və konstruktiv əməkdaşlığın tərəfdarı olduğunu bildirib: "Əlbəttə, biz ötən il Azərbaycanda keçirilən parlament seçkilərini müşahidə edə bilmədiyimiz üçün təəssüf edirik. Əgər müşahidəçilərin sayı bizim seçki metodologiyasında qeyd ediləndən az olarsa, monitorinqin nəticələrinin həqiqəti əks etdirəcəyinə təminat verə bilmərik. Lakin biz hələ də bununla bağlı müzakirələrə hazırıq”.

 

Azərbaycanın DTİHB üçün vacib tərəfdaş olduğunu deyən M. Link ölkəyə yeni birgə layihələrin təklif ediləcəyini deyib.

 

"Son seçkiləri müşahidə edə bilməsək də, əməkdaşlığımız davam edir”, - deyə DTİHB direktoru əlavə edib.