ABŞ səfiri Ermənistanın nüvə bombası hədələrini şərh etdi

"Qəti şəkildə etiraz edirik”.

31 mart - 1 aprel tarixində ABŞ-da nüvə sammiti keçirilmişdir. Azərbaycan və Ermənistan prezidentləri İlham Əliyev və Serj Sarkisyan həmin tədbirə dəvət olunmuşdular. Sammitdə prezident Obamanın diqqət ayırdığı əsas məqam nüvə silahlarının yayılmasının qarşısının alınması olub.

Oxu.Az xəbər verir ki, bu sözləri ABŞ-ın Azərbaycandakı səfiri Robert Sekuta Ermənistanın bəzi deputatlarının rəsmi Yerevanın nüvə silahına malik olması, Azərbaycanı nüvə silahı ilə hədələməsi barədə bəyanatlarını şərh edərkən bildirib.

Səfir qeyd edib ki, Birləşmiş Ştatlar nüvə silahının və kütləvi qırğın silahlarının tətbiqi və yayılmasına qəti şəkildə etiraz edir.

"Bizim nüvə sammitindəki mövqeyimiz də bir daha kütləvi qırğın silahlarının yayılması və nüvə silahının tətbiqinə qarşı rəsmi etirazımızın göstəricisidir”.