XİN alman deputatın adını arzuolunmaz şəxslər siyahısına daxil edəcək

"Almaniyanın Solçular partiyasından Ulla Yelpkenin Azərbaycanın işğal olunmuş ərazilərinə qanunsuz səfərini və oradan səsləndirdiyi bəyanatlarını qərəzli hesab edir və qınayırıq”.

 

Bu sözləri APA-ya Xarici İşlər Nazirliyinin mətbuat xidmətinin rəhbəri Hikmət Hacıyev deyib. O bildirib ki, özfəaliyyət xarakteri daşıyan birtərəfli səfər Ermənistanın işğal etdiyi Azərbaycan ərazilərində hərbi təcavüz, işğal və qanlı etnik təmizləmə nəticəsində yaradılmış qondarma rejimin təşviqinə xidmət edir: "Regionda davamlı sülhün təmin olunmasına töhfə vermək əvəzinə Ulla Yelpkenin bu kimi təhrikçi fəaliyyəti mövcud həssas durumda münaqişənin həlli üzrə göstərilən səylərə xələl gətirmək və vəziyyəti daha da gərginləşdirmək məqsədi daşıyır. Məsələ ilə əlaqədar Azərbaycanın Almaniyadakı Səfirliyi Bundestaqa və Almaniya Solçular Partiyasının rəhbərliyinə müraciət edib. Müvafiq dəqiqləşdirmə aparıldıqdan sonra onun adı arzuolunmaz şəxslər siyahısına daxil ediləcək”. 

 

Qeyd edək ki, Dağlıq Qarabağ münaqişəsinin müasir mərhələsi 1988-ci ildə Ermənistan SSR-in Azərbaycan SSR-ə qarşı ərazi iddiaları əsasında başlayıb.

 

1991-1994-cü illərdə Azərbaycanın Dağlıq Qarabağ ərazisi uğrunda Ermənistanla Azərbaycan arasında şiddətli müharibə baş verib. Nəticədə Azərbaycan ərazilərinin 20 faizi - Dağlıq Qarabağ və ətraf 7 inzibati rayon (Laçın, Kəlbəcər, Ağdam, Füzuli, Cəbrayıl, Qubadlı, Zəngilan) Ermənistan Silahlı Qüvvələri tərəfindən işğal olunub, 1 milyondan artıq insan qaçqın və məcburi köçkün vəziyyətinə düşüb. Hərbi əməliyyatlar 1994-cü ilin may ayında Bişkekdə Azərbaycan və Ermənistan arasında imzalanmış atəşkəs sazişi ilə başa çatıb.

 

Dağlıq Qarabağ münaqişəsinin həlli ilə ATƏT-in Minsk qrupu məşğul olur. Qrup ATƏT-in Nazirlər Şurasının 1992-ci ilin 24 martında Helsinkidə keçirilmiş görüşündə yaradılıb. Qrupun üzvləri Azərbaycan, Ermənistan, Rusiya, Amerika Birləşmiş Ştatları, Fransa, İtaliya, Almaniya, Türkiyə, Belarus, Finlandiya və İsveçdir.

 

1996-cı ilin dekabrından onun Rusiya, ABŞ və Fransadan ibarət həmsədrlik institutu fəaliyyət göstərir.

 

Ermənistan qoşunlarının Dağlıq Qarabağdan qeyd-şərtsiz çıxarılması ilə bağlı BMT Təhlükəsizlik Şurasının 1993-cü ildə qısa fasilələrlə qəbul edilmiş 822, 853, 874 və 884 saylı qətnamələri, o cümlədən BMT Baş Assambleyası, AŞPA, ATƏT, İƏT və digər təşkilat və qurumların qətnamələri mövcuddur.