"İsraildə Azərbaycanla münasibətlərin əleyhinə olan partiya yoxdur"

 

APA-nın İsrailə ezam olunmuş müxbiri xəbər verir ki, bunu İsrail Fəhlə Partiyasının baş katibi, Knessetin (parlament) vitse-spikeri Hilik Bar deyib.

 

Onun sözlərinə görə, iki ölkə arasında münasibətlər strateji əməkdaşlıq səviyyəsindədir: "Bizim Azərbaycandan, Azərbaycanın da bizdən öyrənəcəyi çox şey var. Biz Qafqazda belə güclü və vacib müttəfiqimizin olmasından çox məmnunuq. Bu, İsrailin xarici siyasət istiqmətlərindən biridir. Bunu möhkəmləndirmək üçün əlimizdən gələni edəcəyik. İsraildə elə partiya tanımıram ki, Azərbaycanla münasibətlərin əleyhinə olsun. Kəskin solçu partiyalardan kəskin sağçı partiyalara kimi hamısı Azərbaycanla İsrail arasında münasibətlərin çox vacib olduğunu hesab edir, bunu daha da gücləndirmək üçün çalışır”.

 

O, Azərbaycanda yaşayan yəhudilərin özlərini evlərindəki kimi hiss etdiklərini bildirib: "Mən Sizi yəhudiləri müdafiə etdiyiniz, onlara özlərini öz evlərindəki kimi hiss etmələrinə şərait yaratdığınız üçün alqışlayıram. Hər ölkədə yəhudilərə, o cümlədən də digər azlıqlara qarşı bu qədər tolerant ola bilmirlər. Hətta ağır günlərində belə Azərbaycan yəhudiləri, sinaqoqları müdafiə etdi, qorudu. Bunu edə bilən hər bir ölkə böyük ölkədir, xalqı güclü xalqıdır. Mən bunu həqiqətən yüksək qiymətləndirirəm”.