Elşad Həsənov: “Son 25 ildə Azərbaycan misilsiz inkişaf yolunu qət edib”

Elşad Həsənov qeyd edir ki, bu gün bu iş, Heydər Əliyevin layiqli davamçısı, möhtərəm Prezidentimiz İlham Əliyev tərəfindən uğurlu şəkildə davam etdirilir.
"Məhz Heydər Əliyev Azərbaycanın müstəqilliyini 90-cı illərin əvvəllərindəki xaos, hərc-mərclik və tənəzzüldən qurtardı. Müstəqilliyi qazanmaq olar, amma onu qorumaq və əbədi etmək böyük siyasi istedad və uzaqgörənlik tələb edir. Azərbaycanın dövlət müstəqilliyinə nəfəs verən əsas addımları Heydər Əliyev atdı: "Neft sazişi” imzalandı, dövlət idarəçiliyi mexanizmi yaradıldı, Konstitusiya qəbul edildi, nizami ordu quruldu və sairə.”
 
Millət vəkili deyir ki, Heydər Əliyevin azərbaycançılıq ideologiyası milli dövlətçiliyimizin ideoloji əsasını yaratdı. Azərbaycanda dövlətçilik ənənələrinin XX əsrin sonlarında bərpa edilib zənginləşdirilməsi, Azərbaycanın müstəqilliyinin möhkəmləndirilməsi, onun  dönməz xarakter alması, ölkəmizin dinamik iqtisadi inkişaf yolu ilə inamla irəliləməsi, onun beynəlxalq nüfuzunun sürətlə artması Heydər Əliyevin ictimai-siyasi fəaliyyəti sayəsində mümkün olmuşdur.
 
1993-cü ildə Azərbaycanı böyük fəlakətdən xalqın istəyi ilə yenidən hakimiyyətə qayıdan ümummilli lider Heydər Əliyev qurtardı. 1993-cü ilin iyununda vətəndaş qarşıdurması ilə üz-üzə qaldığı bir vaxtda xalqımız öz taleyini Heydər Əliyevə etibar etdi. Xalqın istəyi ilə hakimiyyətə qayıdan Heydər Əliyev siyasi təcrübəsi və sarsılmaz iradəsi sayəsində ölkəni vətəndaş müharibəsi təhlükəsindən qurtardı. Məhz Heydər Əliyev dühası Azərbaycan dövlətçiliyini məhv olmaq təhlükəsindən xilas etdi. 
 
"2000-ci illərin əvvəlindən etibarən isə Azərbaycanın müstəqilliyi yeni bir mərhələyə qədəm qoydu. Prezident İlham Əliyevin rəhbərliyi ilə biz iqtisadi inkişaf, beynəlxalq səhnədə nüfuzumuzun daha da artması və tərəqqi dövrünə qədəm qoyduq. Bu gün biz müstəqilliyimizin sürətli inkişafı mərhələsindəyik. Azərbaycanda böyük transmilli layihələr həyata keçirilir,  ölkəmiz nüfuzlu beynəlxalq yarışlara ev sahibliyi edir və xarici ölkələrlə bərabər hüquqlu dövlət kimi münasibətlər saxlayır”.
 
Prezident İlham Əliyev son çıxışlarının birində dediyi kimi: "Bizim üstünlüyümüz ondan ibarətdir ki, həmişə öz yolumuzla gedirik, öz siyasətimizi aparırıq, heç kimin sözü ilə oturub-durmuruq. Ona görə bu gün Azərbaycanda inkişaf və sabitlik var. Biz 25 ildir ki, müstəqil yaşayan ləyaqətli ölkəyik”.



www.ann.az