Poroşenkodan Qarabağ açıqlaması

ANN.Az azvision.az-a istinadən xəbər verir ki, Poroşenko Azərbaycan, İraq və Polşanın Ukraynaya təyin olunmuş yeni səfirlərinin etimadnamələrini qəbul edib. 

Azərbaycanın Ukraynadakı səfiri A.Xudiyev etimadnaməsini Ukrayna Prezidenti Pyotr Poroşenkoya təqdim edərək, ona Azərbaycan Respublikasının prezidenti İlham Əliyevin xoş və səmimi salamlarını çatdırıb.

Etimadnaməni qəbul edən prezident Pyotr Poroşenko Azərbaycanla Ukrayna arasındakı tarixi dostluq əlaqələrindən söz açıb. O, səfir A.Xudiyevə ölkələrimiz arasındakı çoxşaxəli əlaqələrin daha da inkişaf etdirilməsi istiqamətində uğurlar arzulayıb.

P.Poroşenko BMT TŞ-da Azərbaycanın Ukraynanın ərazi bütövlüyünü və suverenliyini dəstəklədiyinə görə Azərbaycan dövlətinə minnətdarlığını bildirib. Rəsmi Ukraynanın Dağlıq Qarabağ münaqışəsinin Azərbaycanın ərazi bütövlüyü çərçivəsində həll edilməsi istiqamətində yürütdüyü siyasətin dəyişmədiyini və bundan sonra da beynəlxalq arenada Azərbaycanın istənilən haqqlı mövqeyinə dəstək verəcəyini qeyd edib.

Bu ilin iyul ayında Azərbaycana rəsmi səfərini məmnunluqla xatırlayan P.Poroşenko Prezident İlham Əliyevin rəhbərliyi ilə tək Azərbaycanda deyil, ümumiyyətlə, bölgədə qlobal sosial iqtisadi layihələrin həyata keçirildiyini bildirib. O, ölkəmizin inkişaf edərək cənubi qafqazda lider dövlətə çevrilməsinin fərəhləndirici hal olduğunu qeyd edərək, son illər yenidən qurulmuş Bakı şəhərinin gözəlliyinə valeh olduğunu deyib.

P.Poroşenko Azərbaycan və Ukrayna Prezidentləri Şurasında, o cümlədən iqtisadi əməkdaşlıq məsələləri üzrə hökumətlərarası komissiyasının 11-ci iclasında əldə olunmuş razılaşmaların yerinə yetirilməsinin vacibliyini bildirib. Rəsmi Kiyevin Azərbaycanla iqtisadi, ticari əlaqələrin inkişaf etdirilməsinə xüsusi maraq göstərdiyini söyləyən P.Poroşenko bu istiqamətdə ölkələrimiz arasında müştərək istehsalat şirkətlərinin qurulmasının zəruriliyini qeyd edib.

Azərbaycanın dövlət müstəqilliyinin 25-ci ildönümü münasibəti ilə xalqımıza xoş və səmimi təbriklərini ünvanlayan P.Poroşenko müstəqil dövlətimizin inkişafı naminə müstəsna xidmətlər göstərən Prezident İlham Əliyevə səmimi salamlarını çatdırmağı xahiş edib.

Azərbaycanla bağlı dediyi isti və səmimi sözlərə görə, Ukraynanın dövlət başçısına dərin minnətdarlığını bildirən səfir A.Xudiyev beynəlxalq arenada strateji müttəfiqlər kimi tanınan Azərbaycan Ukrayna dostluğunun daha da inkişaf etdirilməsi üçün əlindən gələni əsirgəməyəcəyini vurğulayıb.