Terrorçu-kamikadzelər harada və necə hazırlanır? - Ekspertdən ŞƏRH

Bəs, görəsən, terrorçu-kamikadzelər harada və necə hazırlanır? Kimlər bu insanlardan psixoloji silah kimi istifadə edir?

Bu sualları ANN.Az-a sabiq MTN əməkdaşı, polkovnik-leytenant İlham İsmayıl şərh edib.  

 

 

 

"Onlar fərqli ölkələrdə müxtəlif cür hazırlanır. Məsələn, Fələstində bir cür, Əfqanıstda başqa şəkildə, Pakistanda tamamilə başqa formada hazırlanır. Əfqanıstanda "canlı bomba” kimi heç vaxt qadınlardan istifadə edilmir. Lakin Fələstində və digər ərəb ölkələrində əsasən, ailə üzvlərini itirmiş qadınlar terror aktları üçün seçilir. Pakistanda belə terrorçuları hazırlamaq üçün xüsusi təlim keçirilən yerlər var. İran digər ölkə vətəndaşlarından olanları seçir və onlara xüsusi maliyyə ayırır. Lakin İran öz vətəndaşlarından "canlı bomba” kimi istifadə etmir”. 

"Azərbaycanda "canlı bomba” kimi özünü partlatma halları yoxdur. Amma bizdə bəzi vətəndaşların din adı altında Suriyaya göndərilmə faktları mövcuddur. Suriyaya gedən şəxs vuruşacağını və öləcəyini bilir. Həmin şəxslər beyinləri "yuyulmuş” adamlardır. Onlar şəhid olacağını, sanki cənnətə düşəcəklərini düşünürlər. O şəxslərə təlim keçənlər onlara "sən get ora, özünü öldür” demir. Onlar deyirlər ki, insanlar şəhid olmalıdır. Və ya yaxud da, bu əməli tutumaqla cənnətə düşəcəklərini deyərək, onları bir növ ələ alırlar. Azərbaycanda bu şəxslərin hazırlanmasında xüsusi qrup və ya dəstə yoxdur. Əgər, bizdə də xüsusi təlim yerləri olsa, qarmaqarışıqlıq düşərdi”, - deyə sabiq MTN əməkdaşı əlavə edib.

"Fərdi "canlı bomba”larla yanaşı, xüsusi təlim keçən "canlı bomba”lar mövcuddur. Təlim keçənlərin də öz yolları var: Din və qisas xətti ilə cinayətləri həyata keçirmək. Terror aktının törədilməsini boynuna götürənlər zombiləşdirilmiş insanlar adlandırmaq da olar. O yerdə ki, təlim mərkəzləri var, orada həmin terorrçuları zombiləşdirirlər. Tək başına qərar verib, fərdi qaydada hərəkət edib,  özünü partladan terrorçuların əsas məqsədi qisas xarakterlidir. Yəni, onlar terror törətməklə kimlərdənsə, bir növ qisaslarını almış olur. Onlarda heç bir zombiləşmə yoxdur. Adətən, Fələstində belə hallara daha çox rast gəlinir”.