Bu klan hakimiyyətdə qalacaq

Milli.Az xəbər verir ki, bunu "Atlas" Araşdırmalar Mərkəzinin rəhbəri, siyasi ekspert Elxan Şahinoğlu Ermənistanda aprelin 2-də keçirilmiş parlament seçkilərinin nəticələrini şərh edərkən bildirib.

Politoloq hesab edir ki, bu seçkilər göstərdi ki, 20 ildir Ermənistanda hakimiyyəti nəzarətdə saxlayan separatçı "Qarabağ klanı" yaxın illərdə də iqtidarını qoruyacaq: "Konstitusiya dəyişdiyindən əsas rol parlamentə və hökumətə keçir. Serj Sarkisyan hər ikisi üzərində nəzarətini saxlayacaq. Bu, o vaxta qədər davam edəcək ki, Ermənistan cəmiyyəti inqilab və ya silah gücünə bu hakimiyyəti devirməsin. Əks halda indiki klan "seçki yolu" ilə hakimiyyətdən gedən deyil".

E.Şahinoğlunun fikrincə, Ermənistanda parlament seçkisinin nəticəsi Dağlıq Qarabağ probleminin həllinə dair danışıqlarda da irəriləyişin olmayacağına işarədir: "İşğal davam edəcək və Sarkisyan əvvəlkitək status-kvonu uzatmağa çalışacaq. Ermənistanda Azərbaycan və Türkiyə ilə münasibətlərin normallaşdırılmasının vacib olduğunu düşünən siyasətçilər var. Ancaq biz nə vaxtsa onların hakimiyyətə gələcəyini gözləyə bilmərik. Vaxt gedir. Qarşımızdakı eyni qüvvədir və onunla danışmağın yolu bəllidir..."

Qeyd edək ki, bu, ölkədə prezident idarəetmə üsulundan parlament idarəetmə üsuluna keçidi nəzərdə tutan 2015-ci ildəki konstitusiya dəyişikliyindən sonra keçirilmiş ilk seçkilər idi. Dəyişikliklərə əsasən, prezidentin səlahiyyətləri azaldılıb, baş nazir və parlamentin səlahiyyətləri isə artırılıb. Ölkənin yeni prezidentini də yeni parlament müəyyənləşdirəcək və prezident, sadəcə, formal səlahiyyətlərə malik olacaq. Poporsional sistem əsasında formalaşacaq parlament üzvləri daha sonra prezidenti 7 illiyə seçəcək. Prezident isə parlament seçkilərində mütləq qələbə qazanmış partiya və ya siyasi blokun namizədini baş nazir təyin edəcək.