Türkiyəli zabitlər Azərbaycana gəlib

anews.az APA-ya istinadən xəbər verir ki, azərbaycanlı qazilərin dəvəti ilə Azərbaycana səfər etdiklərini deyən Türkiyə Hərbi Hava Qüvvələrinin ehtiyatda olan general-polkovniki Ərdoğan Karakuş bildirib ki, səfər zamanı Türkiyə - Azərbaycan münasibətləri ilə bağlı bir sıra müzakirələr aparılacaq: "90-cı illərin əvvəllərində Qarabağda müharibə başlayan zaman mən Ankarada hərbi hava bazasının rəisi idim. Həmin ərəfədə Azərbaycanın hərbi nəqliyyat təyyarələri bazaya enmişdi.

Təyyarələr iki saat ərzində yükləri götürüb, geri qayıtmalı idilər. Təyyarələrin üzərində SSRİ yazılmışdı. Bunu görən kimi dərhal əmr verdim ki, təyyarələrin üzərindəki o söz silinsin, əvəzinə isə "Azərbaycan Hərbi Hava Qüvvələri” yazılsın, eyni zamanda, Azərbaycan bayrağı həkk edilsin. İki saat ərzində təyyarələrin üzərinə "Azərbaycan Hərbi Hava Qüvvələri” yazıldı, Azərbaycan bayrağı həkk edildi”.

General-polkovnik qeyd edib ki, tarix boyu Azərbaycan və Türkiyə arasında gözəl münasibətlər olub: "Biz eyni millətin iki dövlətiyik. Ayağım Azərbaycan torpaqlarına dəyər-dəyməz torpağı öpdüm. Çünki bu, türk adət-ənənəsidir. Bir türk başqa türk dövlətinə gedərkən oranın torpağını öpməlidir. Biz Türkiyə olaraq Dağlıq Qarabağ münaqişəsinin həlli ilə bağlı hər zaman Azərbaycana dəstək verməyə hazırıq”.

Generalın sözlərinə görə, Azərbaycanda rəsmi şəxslərlə görüşlər keçirməyi də planlaşdırırlar.

Qeyd edək ki, Türkiyə ordusunun ehtiyatda olan zabitləri Tərxis Olunmuş Hərbçilərin Gəncləri Maarifləndirmə İctimai Birliyinin dəvəti ilə iyulun 7-dək Azərbaycanda səfərdə olacaqlar.