Bu gün Avstriyada ATƏT nazirlərinin qeyri-rəsmi görüşü keçiriləcək

anews.az Report-a istinadən xəbər verir ki, görüşün əsas mövzusu təşkilat ərazisində münaqişələr və təhlükəsizliyə təhdidlər olacaq.

"Dialoq və əməkdaşlıq vasitəsilə etimad yaradılması” şüarı altında keçiriləcək görüşdə həmçinin miqrasiya, terrorizmə qarşı mübarizə, insan hüquqları, qanunun aliliyi və demokratiya, bu il dekabrın 7-8-də Vyanada keçiriləcək ATƏT-in Xarici İşlər Nazirləri Şurasının illik iclasına hazırlıq məsələləri üzrə müzakirələr aparılacaq.

İclasa ATƏT-in fəaliyyətdə olan sədri, Avstriyanın Avropa, inteqrasiya və xarici işlər üzrə federal naziri Sebastyan Kurts sədrlik edəcək. İclasda ATƏT-ə üzv 57 ölkənin nazirləri, ATƏT PA-nın prezidenti və baş katibi iştirak edəcək.

Plenar iclasdan sonra müzakirələr iki interaktiv dəyirmi masa çərçivəsində davam edəcək. "Terrorizmə səbəb olan zorakı ekstremizm və radikallaşmaya qarşı mübarizə” mövzusunda keçiriləcək dəyirmi masalardan biri ATƏT-in fəaliyyətdə olan sədrinin radikallaşma və zorakı ekstremizm üzrə xüsusi nümayəndəsi Piter Neymann tərəfindən təqdim olunacaq. İkinci dəyirmi masa "ATƏT regionunda cari və gələcək çağırışlara və təhlükəsizlik riskləri üzrə strukturlaşdırılmış dialoq”a həsr olunacaq.

Xatırladaq ki, Mauerbaxdakı görüş çərçivəsində həmçinin Dağlıq Qarabağ münaqişəsinin həlli ilə bağlı ATƏT-in Minsk qrupunun həmsədrlərinin iştirakı ilə Azərbaycan və Ermənistan xarici işlər nazirlərinin növbəti görüşü də planlaşdırılır.