Azərbaycanı qoruyan əsas qüvvə

Bizi qoruyanlardan danışacağam. Qarda, boranda, günün qızmarında, bir sözlə, hər cür hava şəraitində dövlət sərhədlərimizi fasiləsiz olaraq qoruyan sərhədçilərdən danışacağam. Axı bu gün onların günüdür. 18 avqust günündə - sərhədçilərimizin peşə bayramı günündə Azərbaycanın Dövlət Sərhəd Xidmətinin ilk və ən qabaqcıl dəstələrindən olan Xudat sərhəd dəstəsinin yerli əhali ilə sıx təmasda olmasından danışsam yerinə düşər.

1992-ci ilin 16 iyununda Qusarın Samur çayı üzərində bir vaqonda Yalama əlahiddə buraxılış məntəqəsi adı altında baş leytenant, indi Dövlət Sərhəd Xidmətinin rəisi, general-polkovnik Elçin Quliyevin rəhbərliyi ilə fəaliyyətə başlayan Xudat sərhəd dəstəsinin indi Qusar, Xaçmaz rayonlarında və Qubanın Xınalıq kəndində xeyli zastavası var. (Hərbi qurum olduğundan konkret rəqəm açıqlanmamalıdır)

Şimal rayonlarının sərhədyanı ərazilərində və əsasən dağlıq zonada yerləşən sərhəd zastavalarında yerli əhalinin hərbçilərlə sıx ünsiyyəti var. Düzdür, Rusiya ilə sərhəddə sərhəd strukturu formalaşanda illər boyu sərhədi açıq görən sakinlər birdən-birə buna alışa bilmirdilər, narazılıq edirdilər. Amma, sərhədçilərin yerli əhali ilə təmasda təmkinliliyə xüsusi üstünlük verməsi tezliklə öz müsbət səmərəsini verməyə başladı. Sərhəd məntəqələrində və zastavalarında qayda-qanunun ciddiliyini və özlərinə qarşı diqqətcilliyi görən şimallı hər bir sakinin bu qurumla sıx əməkdaşlığı başlanıldı.               

Dediklərimə bir faktı nümunə gətirmək istəyirəm. Bir neçə il bundan əvvəl Qusarın Rusiya ilə dağ sərhədində yerləşən Ləzə kəndində sərhəd zastavasının yaradılması yerli sakinlərin narazılığına səbəb olmuşdu. Öz  otlaq sahələrinə gedə bilməyəcəklərini fərz edən sakinlər zastavanın inşasını istəmirdilər. ANS-in çəkiliş qrupu o vaxt sakinlərin narazılığını videolentə almışdı. Amma qısa vaxt ərzində sərhədçilərin apardığı danışıqlardan sonra Ləzə sakinləri dövlət sərhədi zolağında zastavanın olmasının vacibliyini anladılar. İndi burada yerləşən eyni adlı zastavanın yerli sakinlərlə gözəl ünsiyyəti var. Bir vaxtlar biçənək, otlaq sahələrinə gedə bilməyəcəyindən ehtiyatlanan sakinlərin indi bu sarıdan heç bir narahatçılığı yoxdur. Sərhəd zolağında ot sahəsi olan sakinlərin hamısına, o cümlədən bütün ailə üzvlərinə Xudat sərhəd  dəstəsi tərəfindən buraxılış vəsiqəsi verilib. Ümumiyyətlə, sərhəd rayonlarında sərhəd zolağında torpağı olan yerli əhalinin hamısı buraxılış vəsiqəsi ilə təmin olunub.   

Sərhəd qoruyucularını fövqaladə hallarda həmişə camaatın yanında görmüşəm və görməkdəyəm. 2015-ci il avqust ayının 1-də Xınalığa qəfil yağan güclü yağış nəticəsində kəndarası yollar dağılmış, sel iri, tonlarla çəkisi olan daşları gətirib yolu bağlamışdı. Xınalıq sərhəd zastavasının o vaxtki rəisi, indi Şəmkir sərhəd dəstəsinin əməkdaşı olan Taleh Əsgərovu onda camaatın yanında gördüm.

Analoji hallarla Qusarın Kirik kəndi ərazisində Samur çayı daşarkən, dağlıq ərazidə yerləşən Sudur zastavasına və eyni adlı kəndə gedən yolu qar basarkən, yol sürüşərkən də bütün günü xidmətdə olan sərhədçiləri sakinlərə kömək edən görmüşəm.

18 avqust - mərhum Heydər Əliyevin 2000-ci il 16 avqust tarixli sərəncamı ilə sərhədçilərin peşə bayramı günü kimi təsis edilən bu gün ölkəmizin su, hava, quru sərhədlərinin etibarlı qoruyucusu və təminatçısı olan hər bir hərbçimizin günüdür. Amma, tək sərhədçilərimizinmi? Yox... Azərbaycanın dövlət sərhədlərinin suverenliyini, toxunulmazlığını, torpaqlarımızın ərazi bütövlüyünü sevən hər birimizin günüdür bu gün. Axı, Vətən sərhəddən başlayır...
Aytəkin Alxaslı,
İstiPress-in şimal bürosu

www.anews.az