Kremlin İrəvana 100 milyonluq silah verməsinin SİRLƏRİ

Musabəyovun fikrincə, Rusiya bunu Ermənistanın Qarabağ danışıqlarında inadkar davranmağa ürəkləndirmək məqsədilə edir.

"Çünki Dağlıq Qarabağ münaqişəsi Moskvanın dalanından çıxdı və müzakirə məkanı kimi Cenevrə seçildi”, - deyə o, oktyabrın 16-da keçiriləcək prezidentlərin görüşünə işarə vurub.

Publika.az xəbər verir ki, bu ehtimal mümkündür, lakin Rusiyanın indiki məqamda Ermənistana 100 milyon dollarlıq silah krediti verməsinin arxasında başqa səbəblərin olması versiyası da mövcuddur.

Sarkisyanın şantajı: Ermənistan parlamentində müxalifət fraksiyası olan "Yelk” bloku ölkənin Avrasiya İqtisadi İttifaqından və Kollektiv Təhlükəsizlik Müqaviləsi Təşkilatından çıxması ilə bağlı təkliflər paketi hazırladı. Bu məsələ parlamentdə qəbul olunmasa da, ciddi müzakirələrə səbəb oldu və müzakirələrin hələ də davam etdiyi müşahidə olunur. "Yelk” müxalifət blokudur və hesab etmək olar ki, qərbyönümlü siyasi qüvvələr Rusiya buxovundan xilas olmağın yollarını axtarır. Lakin Moskva hesab edir ki, "Yelk” bloku Serj Sarkisyan hakimiyyətinin gizli layihəsidir. Təklif də əslində Baqramyan 26-da (Ermənistan Prezident Administrasiyasının ünvanı) hazırlanıb. Sarkisyan bu təklifi "Yelk”in adından irəli sürməklə həm özünü hədəfdən yayındırır, həm də Moskvanı şantaj edir. Bu prosesin nəticəsində Ermənistan "Putin ittifaqlarından” çıxmadı, lakin cəmiyyətdə anti-Rusiya əhval-ruhiyyəsi gündəmə gətirildi. 

Rusiyanın indiki məqamda Ermənistana 100 milyon dollarlıq silah krediti ayırması Sarkisyanın şantajının işə yaradığını göstərir.

Çərçivə Sazişi: Lakin Moskvanın ayırdığı "kredit”in arxasında Sarkisayanın oyunundan daha çox, Avropa İttifaqının Ermənistanı ələ keçirməsi gözləntilərinin dayandığını deyə bilərik. Noyabr ayında Avropa İttifaqı ilə Ermənistan arasında Çərçivə Sazişinin imzalanması gözlənilir. İttifaq dünən 357 səhifəlik yeni sazişi dərc etdi. 2013-cü ildə Ermənistanın son anda Brüsselə "atdığını” nəzərə alsaq, bu dəfə də analoji halın yaşanacağı gözləntisi böyükdür. Çünki "Putin ittifaq”ında təmsil olunmaqla hakimiyyətini qoruyan Sarkisyan bu riskə getməz. Amma Ermənistan prezidentinin avropalı qonaqları İrəvanda qarşıladığı da müşahidə olunur. Sarkisyan bununla Moskvaya mesaj verir, həmçinin, özünün "Ermənistanda ruslar üçün alternativsiz” olduğunu sübut etməyə çalışır. Çünki 2018-ci ilin aprelində prezident postunu təhvil verəcək Sarkisyan Təhlükəsizlik Şurasının katibi olaraq ölkə üzərində nəzarəti saxlamaq niyyətindədir. 

Bunun üçün də ilk növbədə Moskvanın dəstəyi lazımdır. Sarkisyanın "blef” etdiyini güman ki, Rusiya da anlayır, amma Moskvaya indiki məqamda Ermənistana "kötək” yox, "kökə” göstərmək sərfəlidir. 100 milyon dollarlıq silah kreditini də məhz "rus kökəsi” adlandırmaq olar.