Roma Qarabağla bağlı nə edə bilər?

Politoloq Elxan Şahinoğlu Axar.az-a açıqlamasında 25 ildə ATƏT-ə sədrlik edən bütün dövlətlərin eyni açıqlamanı verdiyini bildirib. Siyasi şərhçi qeyd edib ki, Azərbaycan yaxın keçmişdə ATƏT-ə sədrlik edən Qazaxıstan və Almaniyadan daha çox fəallıq umurdu:

"Astana bəlkə də hamıdan çox Dağlıq Qarabağ münaqişəsinin həllini sürətləndirmək istəyirdi, ancaq ATƏT-ə sədrlik simvolik xarakter daşıyır. Çünki nə qədər fəal olsan da, o birilərdən səs çıxmasa, nəticə olmayacaq. Əsas söz sahibi isə böyük dövlətlərdir, onlar da Dağlıq Qarabağ münaqişəsinin həllini sürətləndirmək üçün heç nə etmirlər. Tutaq ki, İtaliya münaqişənin həlli məqsədilə mərhələli həll planının qəbulunu vacib saydı, ancaq Ermənistan "yox” deyəndən və Kreml bunu gizli və açıq şəkildə dəstəklədikdən sonra Roma nə edə biləcək? ATƏT-in Minsk Qrupunun ilk illərdə sədrlərindən biri məhz italiyalı deputat və diplomat Mario Rafaelli idi. O da münaqişənin həlli üçün ilk növbədə Dağlıq Qarabağ ətrafındakı rayonların azad olunmasının vacibliyini bildirirdi. O vaxtdan 25 il keçib, dəyişən bir şey yoxdur”.

Qeyd edək ki, yanvarın 1-dən ATƏT-ə İtaliyanın Xarici İşlər naziri Angelino Alfano sədrlik edir. A.Alfano ölkəsinin ATƏT-ə sədrlik etdiyi dövrdə təşkilatın hazırda dondurulmuş münaqişələrin həlli istiqamətində fəaliyyətini gücləndirəcəyini bildirib.