Əfv sərəncamı nə vaxt imzalanacaq? – Açıqlama

Bu sözləri Axar.az-a açıqlamasında Əfv Məsələləri Komissiyasının üzvü Əliməmməd Nuriyev deyib. Əfv sərəncamının nə zaman imzalanacağının dəqiq bilinmədiyini və bunun birbaşa prezidentin səlahiyyətində olduğunu deyən Əliməmməd Nuriyev baxılan müraciətlərə toxunub:

"Əfv Məsələləri Komissiyası öz işini başa çatdırmayıb, hələ iclaslar davam etməkdədir. Artıq bir neçə iclas keçirilib. Məhkumlar barəsində müraciətlərə, sənədlərə baxılır və bütün bu proseslər davam etdirilir. Əfv Komissiyası fasiləsiz olaraq çalışır. İclasa təqdim etmək üçün daxil olan müraciətlərlə bağlı müvafiq araşdırmalar aparılır, rəylər hazırlanır. Bu proseslər başa çatdıqdan sonra rəylər cənab prezidentə təqdim olunacaq. Yalnız bu mərhələdən sonra əfv sərəncamının verilməsini gözləmək olar”.

Əliməmməd Nuriyev onu da vurğulayıb ki, müraciətlər bütün məhkumlar haqqında daxil olur:

"Fərq etməz onun cəzası ömürlükdür, ya yox. Biz bu və digər şəxslərlə bağlı məlumatları dinləyir və qərar hazırlanması ilə bağlı rəy veririk. Rəyin nəzərə alınıb-alınmaması isə cənab prezidentin səlahiyyətində olan məsələdir”.

Qeyd edək ki, Azərbaycan müstəqillik əldə etdikdən bu günə qədər 61 əfv sərəncamı imzalanıb.