Deputat: Orta məktəbdə oxuyanda palto görməmişəm, geyinməmişəm - FOTO

Milli Məclisin deputatı Vahid Əhmədov uşaqlıq illəri ilə bağlı maraqlı xatirələrini bölüşüb.

 

Millət vəkili "Modern.az" saytının hazırladığı "Mənim kəndim" rubrikası çərçivəsində mətbuatda indiyədək barəsində bilinməyən faktları və fotoşəkilləri üzə çıxarıb.

V.Əhmədov Quba rayonunun Qonaqkənd qəsəbəsində keçən uşaqlıq illərindən danışıb. Ailələrinin böyük olduğunu qeyd edən deputat bildirib ki, 7 qardaş və 2 bacı olublar: " Böyük qardaşım rəhmətə gedib. Qardaş-bacılarımın hamısı oxumuş olublar və sonralar Bakıda yaşayıblar. Ailədə çox uşaq olduğumuza görə, çox dalaşırdıq. Kim böyük idisə, balacanı döyürdü. Mən sakit, oxuyan uşaq olmuşam".

Millət vəkilinin sözlərinə görə, oxuduğu illərdə məktəbə gedirdi, evə qayıdan kimi meşəyə odun qırmağa yollanırdı "Bunu da başa çatdırdıqdan sonra gecə, lampa, şam işığında dərslərimi həll edirdim. Hətta gecə saat 1-2-yə kimi üzü üstə uzanıb, kitab oxuyardım. Orta məktəbdə oxuduğum vaxtda palto görməmişəm, geyinməmişəm. Yalnız tələbə olub, Bakıya gələndə paltonun nə olduğunu bildim".

V. Əhmədov tələbəlik illərindən da danışıb: "Tələbəlik illərimdə Şmidt adına zavodda (indiki Səttərxan adına zavod) getdim. 1965-ci ildə böyük qardaşım uzun çətinliklə, tanışlıqla məni orada yerləşdirə bildi. Qardaşım həmin zavodun direktoru Həsən Nemətovun katibəsini əməliyyat etmişdi. Bu tanışlıq zavoda fəhlə düzəlməyimə kömək etdi. İlk maaşımla hədiyyə alıb, valideynlərimə göndərmişəm. Ümumiyyətlə, hər ay maaşımdan atama pul göndərirdim. Şmidt adına zavodda (indiki Səttarxan adına zavod) mən ilk olaraq, fəhlə işləmişəm. Sex süpürürdüm, təxmini 80 manat maaş alırdım. Həmin vaxt bu, böyük pul idi. Arxamda isə qardaşımdan başqa heç kimin yox idi. Mən özümü göstərdikcə, yaxşı işlədikcə, vəzifəm artırdı. Bir müddət keçəndən sonra usta kimi çalışdım. Artıq bu vaxtlarda hiss edirsən ki, sən cəmiyyətə lazımsan. Bundan sonra sahə rəisi kimi çalışdım və əsgər getdim. Amma hərbi xidməti bitirib, qayıdandan sonra fəaliyyətimim o zavodda davam etdirmədim. Bakı Radio Zavodunda çalışmağa başladım".