Paşinyandan Qarabağla bağlı açıqlama - Bu dəfə daha da irəli getdi

"Dağlıq Qarabağ "hakimiyyəti” danışıqlar masasında iştirak etmədiyi müddətdə münaqişənin həlli uzaqdadır”.

Bu barədə Ermənistanda baş nazir səlahiyyətlərini müvəqqəti icra edən Nikol Paşinyan parlamentin baş nazirin seçilməsi ilə bağlı keçirilən xüsusi iclasında çıxışı zamanı deyib.

Paşinyan iddia edib ki, Ermənistan rəhbərliyinə bu ölkədəki xalqın maraqlarını təqdim etmək səlahiyyəti verilib.

"Lakin Qarabağ xalqının maraqlarını Ermənistan yox, onların öz hakimiyyəti təqdim edə bilər. Çünki onlar müstəqildirlər”, - deyə Paşinyan əvvəlki absurd fikirlərini davam etdirib.

Paşinyan təkzib edib ki, Qarabağla bağlı gizli danışıqlar aparılmır.

"Danışıqlar zamanı Qarabağ münaqişəsinin həlli variantı formalaşacaqsa və mən bunu münasib hesab edəcəmsə, bu haqda ilk növbədə xalqın fikrini soruşacağıq”, - deyə o bildirib.

Qeyd edək ki, bu gün Ermənistan parlamenti baş nazirin seçilməsi üçün xüsusi iclas keçirir. Parlamentin iclasında baş nazir seçilməsə, qanunverici orqan buraxılacaq və növbədənkənar parlament seçkiləri keçiriləcək./publika.az