“Lazım olsa hücum edəcəyik” – Ermənistan müdafiə naziri müharibədən danışdı

"Əgər söhbət hərbi əməliyyatların bərpasından gedirsə, onda biz ləngiməyəcəyik”

 Ermənistan silah aldığı zaman kəmiyyətə deyil, keyfiyyətə üstünlük verəcək. Sputnik Ermənistan xəbər verir ki, bunu Ermənistanın müdafiə naziri David Tonoyan Ermənistanın İctimai Televiziyasına müsahibəsində bildirib. 

Nazirin sözlərinə görə, Ermənistanın iqtisadi və demoqrafik imkanları Azərbaycanla müqayisə oluna bilməz. Məhz buna görə Ermənistan keyfiyyətə önəm verəcək. 

Tonoyan əlavə edib ki, Ermənistan hücum silahları almağa davam edir. İndi çox şey dəyişir – psixologiya, müdafiə siyasətini qurmağa dair yanaşmalar.

O vurğulayıb ki, təcrübəyə əsasən, daima müdafiədə olan ordular son nəticədə məğlub olur: "Biz müdafiə mövqeyində qalmağa hazırlaşmırıq. Əgər söhbət hərbi əməliyyatların bərpasından gedirsə, onda biz ləngiməyəcəyik”.

"Ermənistan ordusu hücum edəcəkmi?” sualına cavab olaraq nazir cavab verib: "Niyə də yox!”.

Tonoyan, həmçinin əlavə edib ki, rəsmi Yerevan silah almaq üçün Rusiyadan 100 milyon dollar dəyərində yeni kredit götürməyə hazırlaşır. Bu silahlar silahlanma yarışına girmədən (Azərbaycanla –red.) qoyulmuş hədəfləri yerinə yetirməyə imkan verir. Hansı silahların alınması isə hələlik hərbi sirdir.    /sputnik.az/