Prezident növbəti dəfə Saray nənəylə görüşdü

Prezident İlham Əliyevlə xanımı Mehriban Əliyeva bu gün Şamaxıda zəlzələdən zərərçəkmiş ailələr üçün tikilən yeni evlərlə tanış olublar.

Anews.az "qafqazinfo"ya istinadla xəbər verir ki, prezident İlham Əliyev və birinci xanım Mehriban Əliyeva Saray Eyvazovanın da yaşadığı Salman Mümtaz küçəsində Rasim Həsənovun yeni tikilmiş evində yaradılan şəraitlə tanış olublar, çay süfrəsi arxasında ailə üzvləri ilə söhbət ediblər.

Qeyd edək ki, fevralın 5-də və 6-da baş vermiş zəlzələdən dərhal sonra Şamaxıya gedən ölkə başçısı Saray nənəylə görüşü ilə bağlı müsahibəsində də danışmışdı.

Prezident görüşün onda çox böyük təəssürat yaratdığını qeyd etmişdi:

"Saray nənə kimi nənələr, analar bizim milli-mənəvi dəyərlərimizi əsrlər boyu qoruyan insanlar olublar. Hər bir Azərbaycan qadını Saray nənəyə oxşamaq istəyir. Məncə, bu, belədir. Baxın, evi dağılmış 92 yaşında bir qadın, bu adamda nə qədər nikbinlik var. Çünki Saray nənədə inam var ki, dövlət onun yanında olacaq. Sözün düzü, mən Şamaxıya gedəndə bilmirdim ki, Saray nənə ilə rastlaşacağam. Ümid edirəm ki, tezliklə Saray nənə ilə bir daha görüşəcəyəm və yeni evinin açarını ona təqdim edəcəyəm".