Suriyadan Qarabağa uzanan qorxunc təhlükə: böyük dövlətlərin çirkin planının detalları

Özlərini 104 il öncə - 1915-ci il hadisələrindən sonra Suriya və Livana köç edənlərin nəvələri adlandıran bir qrup erməni PKK/PYD terror təşkilatının himayəsi altında yenidən təşkilatlanıb. Daha əvvəl müxtəlif terrorçu qruplarla birlikdə fəaliyyət göstərən ermənilər bu dəfə öz taborlarını qurmağa cəhd göstərir. Terror təşkilatının yayım orqanlarının verdiyi məlumata görə, erməni qrupa Suriyada öldürülən terrorçu kommunist Nubar Ozanyanın (Orxan Bakırcıyan) adı verilib.

Hər gün hərbi və psixoloji təlimlər keçən terrorçuların qaldığı qərargahın divarlarında qəribə yazılara və fotolara rast gəlinir. Bunlardan biri 1982-ci ildə 9 nəfərin həlak olduğu, 72 nəfərin yaralandığı Əsənboğa hücumunu gerçəkləşdirən ASALA terror təşkilatının üzvü Levon Ekmeçiyanın fotosudur.

PKK terror təşkilatı ilə ermənilərin radikal qrupları arasında münasibətlər bununla məhdudlaşmır. Azərbaycanın ermənilər tərəfindən işğal olunmuş Dağlıq Qarabağ bölgəsinə gələn PKK-çılar işğalçı qruplara dəstək vermişdi. Qəndil və Qamışlıdan gələn briliklər Ağrı bölgəsindən Ermənistana keçmişdi. Göyçə (Sevan) gölü bölgəsindən PKK üçün ayrılan Vardenes düşərgəsində qonaq olan 400 nəfərlik qrup Qarabağda müharibənin alovlanması ilə birlikdə qaynar nöqtələrə göndərilmişdi.

Politoloq, sabiq diplomat Fikrət Sadıxov məsələ ilə bağlı Publika.az-a açıqlamasında bildirdi ki, bu qruplaşma Dağlıq Qarabağ üçün təhlükə mənbəyi ola bilər:

"Belə qruplaşmalar, ilk növbədə, Türkiyənin sərhədlərinə təhlükədir. Təsadüfi deyil ki, Türkiyə Suriya ilə sərhədləri ciddi nəzarət altında saxlayır, bir sıra hərbi əməliyyatlardan sonra təmizlənmiş zona təşkil edir. Lakin erməni tərkibli qruplaşmaların olması təkcə Türkiyənin təhlükəsizliyinə təhdid deyil. Onlar bir çox hallarda öz maraqlarını digər dövlətlərə də istiqamətləndirirlər. Mən ermənilərdən yaradılmış bir terror qruplaşmasının nə zamansa gəlib Dağlıq Qarabağ separatçılarına köməklik edəyəcəklərinə şübhə etmirəm. Doğrudur, onların geniş qüvvələri yoxdur və demək olmaz ki, onlar ən müasir silahlarla təchiz olunublar. Lakin belə kiçikmiqyaslı qüvvələrin arxasında müəyyən güclər var. Təəssüflər olsun ki, bir sıra aparıcı dövlətlərin də bəzi dairələri belə qruplaşmaları öz mübarizələrində istifadə edir. Tarix bizə bunu sübut edir. Hər bir halda, biz ehtiyatlı olmalıyıq. Erməni terrorçuların Ermənistana gəlib Dağlıq Qarabağda təxribat törətmək təhlükəsinə qarşı qabaqlayıcı addımlar atmalıyıq. Beynəlxalq strukturları məlumatlandırmalıyıq, bəyanatlarla çıxış etməliyik. Çünki hərbi əməliyyatlardan qabaq diplomatik aktivlik nümayiş olunmalıdır.

Belə qruplaşmaların əsas niyyəti harada olursa-olsun, terror aktları törətməkdir. Qalmaqal yaratmaq, vəziyyəti gərginləşdirməkdir. Əgər PKK-nın himayəsində olan ermənilər Ermənistana dəvətsiz gəlsələr belə, əminəm ki, Ermənistanın siyasi rəhbərliyində heç də etirazla qarşılanmayacaqlar. Çünki onlar özləri də terrorçulara oxşar bir dəstədir. Azərbaycana qarşı etnik təmizlənmələrlə məşğul olursa, Xocalı soyqırımı kimi faciələr törədirsə, əlbəttə, onlar terrorla əlbir sayılır. Təəssüflər olsun ki, dünya dövlətləri bu təhlükəni görmür. Görəndə də ya onların başlarını sığallayır, ya da öz maraqları çərçivəsində onların xidmətindən istifadə edir”.

publika.az