“Qarabağdan 100 maşına yaxın hərbçi gəldi, şəxsən mən özüm onları müşaiyət etdim...”

Virtualaz.org xəbər verir ki, Vanyan bu haqda "Azadlıq” radiosunun erməni xidmətinə danışıb.
"2008-ci il martın 1-i idi, saat haradasa 17.00, mənim yadımda deyil, göstəriş gəldi, yoxsa zəng vurdular, yaxud şifahi göstəriş verdilər. Dedilər ki, Yerevana gedən qoşunları müşaiyət edək, digər hissələrin isə Gorusda təhlükəsiz hərəkətini təmin edək. Konkret Qarabağdan-dəqiq rəqəmləri xatırlamıram,-amma deyə bilərəm ki, martın 1-də saat 17.00-dan sonra Gorus qarnizonu üzərindən Qarabağın müdafiə ordusunun hərbçilərini daşıyan haradasa 50-100 yük maşını keçdi. Gorus qarnizonu üzərindən Yerevana yollandılar. Elan edildi ki, qoşunlar gəlməyib, amma şəxsən mən özüm qoşunların Yerevana təhlükəsiz hərəkətini təmin etmişəm”-Vanyan deyib.


Keçmiş hərbçi onu da bildirib ki, Qarabağdan göndərilən həbçilər gecəni Gorusdakı hərbi hissədə keçiriblər. Bundan əlavə hərbçiləri Yerevana daşıyan maşınların bir neçəsində Ermənistan Müdafiə Nazirliyinin nömrə nişanları olub. Hansı ki, bu haqda 1 mart hadisələrinə dair keçmiş prezident Robert Köçəryana və digərlərinə qarşı irəli sürülmüş ittihamda danışılır.
"Biz belə informasiya aldıq ki, Gorusdakı hərbi hissənin maşınlarından dövlət nömrə nişanlarını çıxarıb Qarabağa apardılar və həmin maşınlar artıq Müdafiə Nazirliyinin nömrə nişanları ilə geri qayıtdılar. Ola bilsin başqa dövlət nömrə nişanları da var idi, amma həmin nömrələrlə maşınların olması dəqiqdir”-Vanyan bildirib.

Xatırladaq ki, Robert Köçəryan özü məhkəmədə ifadəsində Dağlıq Qarabağdan Yerevana etirazları yatırmaq üçün qoşunların gətirilməsini inkar edib. "Qarabağ ordusundan bir nəfər də olsun gətirilməmişdi. Bir nəfər də olsun. Sonra izah edərəm söhbət nədən gedir”-o bildirib.
İttiham aktına əsasən isə martın 1-də Levon Ter-Petrosyanın tərəfdarlarına qarşı tətbiq olunmaq üçün Yerevana Qarabağdan minə yaxın hərbçi və zabitlərdən ibarət ayrıca batalyon Yerevana aparılıb.

www.anews.az