İsgəndər Həmidovun partiyası meşəyə yığışacaq

Azərbaycan Milliyyətçi Demokrat Partiyası qurultaya hazırlıq işlərini demək olar ki, yekunlaşdırmaq üzrədir. Bu barədə partiyanın qurultaya hazırlıq üzrə təşkilat komitəsinin rəhbəri İsgəndər Həmidov “Yeni Müsavat”a bildirib. Onun dediyinə görə, qurultayın keçirilməsi sentyabr ayının sonuna nəzərdə tutulub: “Hələ ki, bizə qurultayımızı keçirmək üçün yer ayrılmayıb.Hakimiyyət Azərbaycan Milliyyətçi Demokrat Partiyasına qurultay keçirmək üçün yer verməsə qurultayı meşədə keçirəcəyik. Biz təbiət qoynunda da olsa qurultayı keçirəcəyik. Lakin bu zaman dünya Azərbaycanda siyasi durumun hansı səviyyədə olduğu haqqında təsəvvürə gələcək. Azərbaycan hakimiyyəti heç olmasa bunu nəzərə alıb bizə normal yer ayırsa yaxşı olar”.İ.Həmidov qeyd etdi ki, AMDP-nin rayonlarda konfransları keçirilib və bu proses davam edir: “Konfranslar zamanı şahidi olduq ki, ölkədə milliyyətçi ruhda sağlam gənclik var. Bu gənclik çox vətənpərvərdir. Təəssüf ki, ölkəmizdə gəncliyi də sındırmaq prosesi illərdir aparılır. Gəncliyi bir parça çörəyə möhtac qoyurlar ki, çörəyi naminə kimlərəsə yaltaqlansın. Belə bir vəziyyətdə vətənpərvər, qürurunu qoruyan gənclərin qalmasının özü böyük işdir. Bu cür gənclər gələcəyə ümid verir. Milliyyətçi Demokrat Partiyasına gənclərin gəlişinin qurultayda şahidi olacaqsınız”.İ.Həmidov oktyabr-noyabr aylarından Azərbaycanda siyasi proseslərin aktivləşməsi prosesinin start götürəcəyini də söylədi: “Bu proseslərdə bizim partiyamız da fəal olacaq”.ANN.Az