İsgəndər Həmidovla bağlı duyğusal sözlər: "Təslim olma, cənab general!"

"Mən sənin ayağa qalxmağını istəyirəm, cənab general! Əzrail olsa belə, təslim olma! Ömrümdə birinci dəfədi deyirəm, inad elə İsgəndər Həmidov”.

Qaynarinfo xəbər verir ki, bunu sabiq daxili işlər naziri İsgəndər Həmidovun qardaşı olğlu Şəhriyar Məcidzadə yazıb.

O, gənclik illərinin atasının və əmisinin ağrıları altında keçdiyini deyib:

"Mənim taleyim belə gətirib. Uşaqlıqda güllə səsləri altında oynamışam, yeniyetməlikdə atamın və əmimin həbsxana və məhkəmələri qarşısında oxumuşam, gəncliyimdə isə atamın və əmimin ağrılarına gülümsəyib, heç kimə bəlli etməməyinə şahid olmuşam. Mən onları ədalətsiz istintaq müddətlərində, ədalətsiz məhkəmə proseslərində də elə görmüşəm, son mənzilə doğru gedəndə də. Heç kimə bəlli etmədən ağrını, acını yaşayıb, hamını arxayın salıb sonra ölümə doğru yürüdülər... Bax belə dimdik! 

Necə bir taledir ilahi? 2016-cı ilin fevralında atamı görmüşəm. 2020-ci ilin fevralında isə əmim ağır durumdadır. Mən çox üşümüşəm soyuqda. Atam həbs olunub evimizdə axtarış aparılan gündə çox soyuq idi. Evə buraxmamışdılar məni... Əmim həbs olunan günü çox soyuq idi... Atamın vəziyyəti ağırlaşdığı gündə çox soyuq idi və dünəndə çox soyuq idi. Bu başqa günlərdə olan soyuqlardan çox başqadır. Fevral soyuğudur. Adamı elə bil daxildən tutur. Mən sənin ayağa qalxmağını istəyirəm, cənab general! Əzrail olsa belə, təslim olma! Ömrümdə birinci dəfədi deyirəm inad elə, İsgəndər Həmidov!

Ona böhtan atanlara, atamın xidmətlərini oğurlayanlara, özünü Tərtər batalyonunun komandiri elan edənlərə və bu hadisələri görüb susqunluqla üstündən keçənlərə deyirəm, İsgəndər Həmidovun vəziyyəti ağırdır. O, daha ona böhtan atanların üzünə gülümsünməsiylə onları aldada bilməyəcək”.

www.anews.az